अकोला जिल्ह्यात ४० टक्के क्षेत्र लागवडीविना

अकोला ः जिल्ह्यात जून महिन्यात असमतोल स्वरूपाचा पाऊस झाल्याचा फटका पेरणीला बसला आहे. पावसाचा पहिला महिना उलटला तरी पेरणी अवघी ६० टक्क्यांच्या आत राहिलेली आहे. आजवर दोन लाख ८४ हजार हेक्टरवर पेरणी झाली असून त्यात एक लाख ४६ हजार हेक्टर सोयाबीनची लागवड सर्वाधिक झाली आहे.

त्यापाठोपाठ ८० हजार हेक्टरवर कपाशीची पेरणी झाली आहे. अद्यापही ४० टक्के क्षेत्रावर पेरणी पूर्ण व्हायची आहे. यंदाच्या हंगामासाठी ४ लाख ८४ हजार हेक्टरचे नियोजन करण्यात आले आहे. जिल्ह्यात मृग नक्षत्रात पावसाला सुरुवातही झाली. त्यानंतर काही दिवसांतच पेरण्या सुरू झाल्या. परंतु जिल्ह्यात वेगवेगळ्या भागात पाऊस अनियमित स्वरुपात झाल्याने पेरण्यांना फटका बसला. कुठे सोयाबीन पेरले ते उगवले नाही. कुठे जोराच्या पावसाने बियाणे जमिनीत दबले. यामुळे शेकडो शेतकऱ्यांना सोयाबीनची दुबार पेरणी करावी लागणार आहे. याची तयारी शेतकऱ्यांनी सुरू केली आहे.

शिवाय ज्या कंपन्यांचे बियाणे पेरले व उगवले नाही अशा कंपन्यांकडून भरपाई, मदत मिळते का? या प्रतीक्षेत हे सोयाबीन नुकसानग्रस्त शेतकरी थांबलेले आहेत. मागील महिनाभरात मोजके दिवस पावसाने हजेरी दिली आहे. शिवाय जो पाऊस झाला तो तडाखेबंद झाल्याने नुकसानकारक अधिक ठरला. जिल्ह्यात अद्यापही सार्वत्रिक पावसाने हजेरी दिली नसल्याने हंगामाच्या सुरुवातीपासूनच अडचणी सुरू झाल्या आहेत. पावसाचा आढावा घेतला असता यंदा मूर्तिजापूर तालुका पिछाडीवर पडला आहे. या तालुक्यात आजवर १०० मिलिमीटरपेक्षा कमी पाऊस झालेला आहे. सरासरीच्या ६७.८५ टक्केच नोंद झालेली आहे.

जिल्‍ह्यात केवळ तेल्हारा (११२ मिली), पातूर (११० मिली) हे दोन तालुके सोडले तर अजूनही जूनच्या सरासरी इतर पाऊस पडलेला नाही. शेतकऱ्यांनी मिळालेल्या ओलीवर पेरणी केली. काही ठिकाणी उगवणही झाली आहे. परंतु सोयाबीनच्या उगवणीबाबत तक्रारींचा सूर गावागावातून येत आहे.