जळगाव ः खानदेशातील प्रमुख बाजार समित्यांमध्ये तुरीची आवक अत्यल्प आहे. दरही सहा हजार रुपये प्रतिक्विंटलवर स्थिर आहेत. दरात मध्यंतरी चढउतार झाले. परंतु दर सहा हजार रुपयांखाली आलेले नाहीत. कमी दर्जाच्या तुरीचे दर ५४०० रुपयांपर्यंत आहेत.
देशी प्रकारच्या तुरीचे दर जळगाव, अमळनेर, चोपडा भागातील बाजारात सहा हजार रुपये प्रतिक्विंटलपेक्षा अधिक आहेत. तुरीची मागणी बाजारात यंदा बऱ्यापैकी होती. दर हमीभावाच्या नजीक व हमीभावापेक्षा अधिक राहिले. त्यामुळे शासकीय खरेदीलाही प्रतिसाद मिळालेला नाही. शासकीय खरेदी जळगाव, अमळनेर आदी केंद्रांमध्ये झालेलीच नाही.
जळगाव, चोपडा, अमळनेर येथील बाजार तुरीची आवक गेल्या पंधरवड्यात मिळून प्रतिदिन सरासरी दोन हजार क्विंटल एवढी होती. या आवकेत या पंधरवड्यात ४० ते ४२ टक्के घट झाली आहे. आवक फक्त प्रतिदिन सरासरी ११०० क्विंटल एवढीच राहिली आहे. दर स्थिर आहेत. सध्या जळगाव येथील बाजारात जालना, औरंगाबाद, लातूर भागातून मोठे व्यापारी तुरीचा पुरवठा करून घेत आहेत. जळगावातील मोठे खरेदीदार मध्य प्रदेश व उत्तरेकडे तुरीची पाठवणूक करीत आहेत. शेतकऱ्यांकडील आवक कमी झाली आहे.
आवक अत्यल्प
खानदेशात जळगाव जिल्ह्यात मुक्ताईनगर, रावेर, अमळनेर, पाचोरा भागात तूर लागवड झाली होती. धुळ्यात फारशी लागवड झाली नव्हती. इतर शेतकरी तूर, कडधान्य पिकात आंतरपीक म्हणून तुरीचे उत्पादन घेतात. तुरीची मळणी जानेवारीत सुरू झाली. या महिन्याच्या सुरुवातीला आवक बऱ्यापैकी होती. परंतु सध्या आवक कमी झाली आहे. पुढे आणखी आवक कमी होईल. धुळ्यातील शिरपूर बाजार समितीतही तुरीची आवक अत्यल्प असल्याची माहिती मिळाली.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.