सोलापूर जिल्हा परिषदेकडून हातपंप दुरुस्तीसाठी ५० लाख

सोलापूर  ः उन्हाळ्याची तयारी जिल्हा परिषदेच्या वतीने सुरू झाली आहे. उन्हाळ्यात पाणीटंचाईवर मात करण्यासाठी हातपंप दुरुस्त असणे गरजेचे आहे. त्यामुळे नुकत्याच झालेल्या स्थायी समितीच्या बैठकीत हातपंप दुरुस्तीसाठी ५० लाख, तर पाइप खरेदीसाठी ४१ लाख रुपयांच्या निधीची तरतूद करण्याचा निर्णय घेतल्याची माहिती अध्यक्ष अनिरुद्ध कांबळे यांनी दिली.  श्री. कांबळे यांच्या अध्यक्षतेखाली झालेल्या बैठकीसाठी उपाध्यक्ष दिलीप चव्हाण, कृषी समितीचे सभापती अनिल मोटे, बांधकाम समितीचे सभापती विजयराज डोंगरे, महिला व बालकल्याण समितीच्या सभापती स्वाती शटगार, समाजकल्याण समितीच्या सभापती संगीता धांडोरे, उमेश पाटील, किरण मोरे, अतुल पवार, ज्योती पाटील, नितीन नकाते, त्रिभुवन धाईंजे, आनंद तानवडे उपस्थित होते. या वेळी विविध विषयांवर चर्चा झाली. पण सध्या थंडी संपून उन्हाळ्याची चाहूल लागली आहे. त्या पार्श्‍वभूमीवर संभाव्य पाणी टंचाईवर या बैठकीत चर्चा झाली. तसेच तातडीने यावर निर्णय घेण्याचे ठरले. त्यानुसार हातपंप आणि पाईपचा विषय आला. त्याला तत्काळ मंजुरी देण्यात आली. तसेच अकलूज-माळेवाडी ग्रामपंचायतीचे नगर परिषदेमध्ये, महाळुंग-श्रीपूर ग्रामपंचायतीचे नगरपंचायत, नातेपुते ग्रामपंचायतीचे नगरपंचायतीत रूपांतर करण्याचा ठरावही बैठकीत घेऊन तो शासनाकडे पाठविण्यात आला. पुळूज व करोळे (ता. पंढरपूर) या दोन ग्रामपंचायतींना व्यापारी गाळे बांधण्यासाठी अनुक्रमे २२ व सात लाख रुपयांचे कर्ज देण्याचा निर्णयही या वेळी झाला.