मराठवाड्यातील प्रकल्पांतील पाणीसाठा ५० टक्क्यांवर

औरंगाबाद : मराठवाड्यातील ८७३ प्रकल्पातील उपयुक्त पाणीसाठा ५०.२० टक्क्यांवर पोहोचला आहे. गत आठवड्याच्या तुलनेत प्रकल्पातील पाणीसाठ्यात ६ टक्क्यांची वाढ झाली आहे. गत आठवड्यात ३ ऑगस्टअखेर मराठवाड्यातील ८७३ प्रकल्पातील उपयुक्त पाणीसाठा ४४ टक्के होता. त्यामध्ये मोठ्या ११ प्रकल्पात ५१ टक्के, ७५ मध्यम प्रकल्पात ४० टक्के, ७४९ लघू प्रकल्‍पात २३ टक्के, गोदावरी नदीवरील १३ बंधाऱ्यात ५७ टक्के तर तेरणा-मांजरा-रेना नदीवरील २५ बंधाऱ्यात १९ टक्के उपयुक्त पाणीसाठ्याचा समावेश होता. ७ ऑगस्टअखेर ११ मोठ्या प्रकल्पातील उपयुक्त पाणीसाठा ५७.८८ टक्क्यांवर तर ७५ मध्यम प्रकल्पातील पाणीसाठा ४७.१५ टक्के, ७४९ लघू प्रकल्पातील पाणीसाठा २७.८२ टक्के, गोदावरी नदीवरील बंधाऱ्यामधील पाणीसाठा ६२.०८ टक्के तर तेरणा, मांजरा, रेना नदीवरील बंधाऱ्यात मधील पाणीसाठा २१.६९ टक्के झाला असल्याची माहिती जलसंपदा विभागाच्यावतीने देण्यात आली. १६३ प्रकल्पात ७५ टक्के पेक्षा जास्त पाणीसाठा मराठवाड्यातील लघू-मध्यम प्रकल्पांपैकी १६३ प्रकल्पात ७५ टक्क्यांपेक्षा जास्त पाणी साठा झाला आहे.त्यामध्ये औरंगाबाद मधील ९, जालना ४, बीड २ तर उस्मानाबाद, नांदेड मधील प्रत्येकी ३ मिळून २१ मध्यम तसेच औरंगाबाद मधील ४५ ,बीडमधील ४०, जालना ६, लातूर ११, उस्मानाबाद ८, नांदेड १३, परभणी ४, तर हिंगोली जिल्ह्यातील १५ मिळून १४२ लघू प्रकल्पांचा समावेश आहे. २६३ प्रकल्पांतील पाणीसाठा जोत्याखाली ७५ मध्यम प्रकल्पांपैकी १६ तसेच ७४९ लघू प्रकल्पांपैकी २४७ प्रकल्पांमधील पाणीसाठा जोत्याखालीच आहेत. जोत्याखाली पाणीसाठा असलेल्या मध्यम प्रकल्पांमध्ये औरंगाबाद,जालन्यातील प्रत्येकी १, बीडमधील ४, लातूरमधील ३ तर उस्मानाबाद मधील ७ मध्यम प्रकल्पांचा समावेश आहे. जोत्याखाली पाणीसाठा असलेल्या लघुप्रकल्पांमध्ये औरंगाबादमधील १३, जालना २१,बीड २६, लातूर ४६, उस्मानाबाद ११५, नांदेड १८ तर परभणी जिल्ह्यातील ८ लघू प्रकल्पांचा समावेश आहे.

६८ लघू, मध्यम प्रकल्प कोरडे मराठवाड्यातील ७५ मध्यम व ७४९ लघू प्रकल्पांपैकी ६८ लघू, मध्यम प्रकल्प अजूनही कोरडे आहेत. त्यामध्ये बीड, लातूर जिल्ह्यातील प्रत्येकी २ मध्यम प्रकल्पांसह उस्मानाबाद मधील एक तसेच औरंगाबादमधील ५, बीडमधील १३,लातूरमधील २६ , उस्मानाबादमधील १९ लघू प्रकल्पांचा समावेश आहे.