सोलापूर : जिल्ह्यात सोयाबीनच्या निकृष्ठ बियाण्यांबाबत शेतकऱ्यांच्या ५१० तक्रारी दाखल झाल्या आहेत. त्यापैकी तालुकास्तरीय तक्रार निवारण समितीने ४५९ तक्रारींची तपासणी केली. त्यापैकी १९३ तक्रारींमध्ये तथ्य आढळले आहे. त्यानुसार फक्त ४८ तक्रारींमध्ये शेतकऱ्यांना बियाणे बदलून देण्यात आले.
जिल्ह्यात यंदा खरिपात सोयाबीनची सर्वाधिक ५० हजारहून अधिक हेक्टरवर पेरणी झाली आहे. त्यात बार्शी, अक्कलकोट, दक्षिण सोलापूर या तालुक्यात सर्वाधिक क्षेत्र आहे. परंतु, यंदा सोयाबीनच्या निकृष्ट बियाण्यामुळे शेतकऱ्यांच्या पेरण्या वाया गेल्या. अनेकठिकाणी बियाणेच उगवले नाही, काही ठिकाणी उगवणक्षमता अत्यंत कमी असल्याचे निदर्शनास आले.
शेतकऱ्यांनी कृषि विभागाकडे ५१० तक्रारी केल्या. जिल्हा अधीक्षक कृषि अधिकारी बसवराज बिराजदार यांनी तालुकास्तरीय समित्या स्थापून त्यामार्फत ४५९ तक्रारींची पडताळणी केली. त्यानुसार दोष आढळले. त्यानंतर बार्शी तालुक्यात ४४ तक्रारींमध्ये, अक्कलकोट तालुक्यात तीन आणि दक्षिण सोलापुरात एका ठिकाणी बियाणे बदलून देण्यात आल्याचे कृषि विभागाकडून सांगण्यात आले.
बार्शी तालुक्यातून ४३१ तक्रारी
सोयाबीनचे क्षेत्र सर्वाधिक बार्शी तालुक्यात आहे. त्यामुळे साहजिकच, बार्शी तालुक्यातून अधिक तक्रारी आल्या. बार्शी तालुक्यात सर्वाधिक ४३१, करमाळ्यात २, अक्कलकोट ३५, दक्षिण सोलापूर १८, मोहोळ १४, उत्तर सोलापूर, माढा १ अशा ५१० तक्रारी प्राप्त आहेत.
शासनाच्या निर्देशानुसार कार्यवाही
जिल्ह्यातून आलेल्या बहुतेक सर्व तक्रारींच्या अनुषंगाने कार्यवाही सुरु आहे. त्या-त्या तक्रारीवर शासनाच्या निर्देशानुसार पंचनामे करुन त्याचा अहवाल शासनाला सादर करण्यात येणार आहे. उगवण न झालेल्या बियाण्यांमध्ये महाबीजचे सर्वाधिक बियाणे आहे. शासनाच्या निर्देशानुसार पुढील कार्यवाही होईल, असे कृषि विभागाकडून सांगण्यात आले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.