मराठवाड्यातील ५५ प्रकल्प कोरडेच

औरंगाबाद : ऑक्‍टोबरमधील पावसाने दुष्काळाने होरपळणाऱ्या प्रकल्पांत पाणी आणले. परंतु, मराठवाड्यातील ८७३ पैकी ५५ लघु मध्यम प्रकल्प अजूनही कोरडेठाकच आहेत. १२१ प्रकल्पांतील पाणीसाठा जोत्याखालीच आहे, अशी माहिती जलसंपदा विभागाच्या सूत्रांनी दिली. 

उपलब्ध उपयुक्‍त पाणीसाठ्यामुळे गरज भागणार असे वाटत असले, तरी पाण्याचा कार्यक्षम व गरज असेल त्याच ठिकाणी योग्य प्रमाणात वापर करण्याकडेही लक्ष देण्याची नितांत गरज आहे. मराठवाड्यात लहान मोठे ८७३ पाणीसाठे आहेत. त्यामधील ११ मोठ्या प्रकल्पांत क्षमतेच्या ८५.५३ टक्‍के उपयुक्‍त पाणी आहे.

दुसरीकडे ७५ मध्यम प्रकल्पांत ५४.२५ टक्‍के, ७४९ लघु प्रकल्पांत ४६.८३ टक्‍के, गोदावरी नदीवरील बंधाऱ्यांमध्ये ९३.९१ टक्‍के, तेरणा, मांजरा, रेणा नदीवरील २५ बंधाऱ्यांमध्ये ६३ टक्‍केच उपयुक्‍त पाणी आहे. मोठ्या प्रकल्पांपैकी बीड जिल्ह्यातील मांजरा व उस्मानाबाद सिनाकोळेगाव प्रकल्पात उपयुक्‍त पाण्याचा थेंब नाही.

दुसरीकडे ७५ मध्यम प्रकल्पांपैकी औरंगाबाद जिल्ह्यातील १ व बीड जिल्ह्यातील तीन मिळून चार प्रकल्पांत उपयुक्‍त पाणी नाही. तर, औरंगाबाद, लातूर  जिल्ह्यांतील प्रत्येकी २, बीड जिल्ह्यातील एक व उस्मानाबाद जिल्ह्यातील ४ अशा ९ मध्यम प्रकल्पांतील पाणीसाठा जोत्याखाली आहे. ७४९ लघु प्रकल्पांपैकी ५१ प्रकल्प कोरडेठाक आहेत. यामध्ये औरंगाबाद जिल्ह्यातील १८, जालना २, बीड १९, लातूर ७, उस्मानाबाद जिल्ह्यातील ५ लघु प्रकल्पांचा समावेश आहे. 

दुसरीकडे ११२ लघु प्रकल्पांतील पाणीसाठा जोत्याखाली आहे. यामध्ये औरंगाबाद जिल्ह्यातील ९, जालना व बीड प्रत्येकी १७, लातूर ३४, उस्मानाबाद २९, नांदेड ५ व परभणी जिल्ह्यातील एका लघु प्रकल्पाचा समावेश असल्याची माहिती जलसंपदा विभागातर्फे देण्यात आली.

३१९ लघु प्रकल्पांत ७५ टक्के पाणी

मराठवाड्यातील ७४९ लघु प्रकल्पांपैकी ३१९ प्रकल्पांत ७५ टक्‍क्‍यांपेक्षा जास्त पाणीसाठा आहे. यामध्ये औरंगाबाद जिल्ह्यातील ४४, जालना १५, बीड ५१, लातूर ५४, उस्मानाबाद ७१, नांदेड ६०, परभणी ६ व हिंगोली जिल्ह्यातील  १८ समावेश आहे. ६९ लघु प्रकल्पांत ५० ते ७५ टक्‍के, ७४ लघु प्रकल्पांत २५ ते ५० टक्‍के पाणीसाठा आहे.