कडेगाव तालुक्यात सत्तर टक्के पिकांचे पंचनामे पूर्ण

कडेगाव, जि. सांगली : तालुक्यात झालेल्या मुसळधार पावसाने नुकसान झालेल्या शेतीपिकांचे कृषी व महसुल विभागामार्फत पंचनामे सुरू झाले आहेत. आत्तापर्यंत सत्तर टक्के पंचनाम्याचे काम पूर्ण झाले आहे. तर येत्या दोन दिवसांत शंभर टक्के पंचनामे पूर्ण होतील, अशी अपेक्षा आहे.

तालुक्याला गेल्या पंधरा दिवसांत मुसळधार पावसाने झोडपून काढले. त्यामुळे तालुक्यातील आले, केळी, भाजीपाला, सोयाबीन, कलिंगड, हळद, द्राक्षे आदी शेती पिकांचे मोठे नुकसान झाले. शेतकऱ्यांनी दिवसरात्र काबाडकष्ट करून व बँका, सोसायटीची कर्जे काढून आपल्या शेतातील पिके जोमात आणली. परंतु अवकाळी पावसाने हातातोंडाला आलेल्या पिकांचे प्रचंड नुकसान झाले. त्यामुळे शेतकऱ्यावर आता कर्जबाजारी होण्याची वेळ आली आहे. अशा रीतीने तालुक्यातील शेती आणि शेतकरी अक्षरशः उद्ध्वस्त झाले आहेत.

परिणामी शेतकऱ्यांना या अस्मानी संकटातून सावरण्यासाठी शासनाने नुकसानग्रस्त शेतकऱ्यांना मदत करण्यासाठी पावले उचलली आहेत. त्यासाठी मुख्यमंत्री ठाकरे यांनी महसुल व कृषी विभागाला शेती पिकांच्या नुकसानीचे पंचनामे करण्याचे आदेश दिले आहेत. त्याप्रमाणे सध्या तालुक्यात कृषी व महसुल विभागाच्या वतीने केळी, भाजीपाला, सोयाबीन, कलिंगड, हळद, द्राक्षे आदी ३२ शेतीपिकांच्या नुकसानीचे पंचनामे करण्याचे काम कृषी सहायक व गावकामगार तलाठी आदींच्याकडून सुरू आहे.

तालुक्यात अवकाळी पावसाने नुकसान झालेल्या शेती पिकांचे पंचनामे करण्याचे काम अंतिम टप्प्यात आहे. ते दोन दिवसांत पूर्ण होईल. त्यानंतर तत्काळ याबाबतचा अहवाल शासनाला सादर केला जाईल. - बी. जी. कदम, तालुका कृषी अधिकारी, कडेगाव