लातूरात सोयाबीनची ७० हजार क्विंटल आवक

लातूर ः जिल्ह्यात या वर्षी जूनपासूनच पाऊस राहिल्याने सोयाबीनचे मोठ्या प्रमाणात उत्पादन झाले आहे. जिल्ह्यात काही भागात परतीच्या पावसाने झटका दिला असला तरी ते क्षेत्र जिल्ह्याच्या तुलनेने कमी आहे. त्यात आता दिवाळीचा सण येत आहे. त्यामुळे शेतकरी मोठ्या प्रमाणात सोयाबीन लातूरच्या अडत बाजारात आणत आहेत. दररोज ७० हजार क्विंटल सोयाबीनची आवक असून, त्या पैकी ५० हजार क्विंटल सोयाबीनचे माप करून खरेदी केली जात आहे. दररोज सोयाबीनच्या गाड्याच्या रांगा लागत आहेत.

या हंगामात अनेक संकटांचा सामना करीत शेतकऱ्यांच्या हाती सोयाबीन आले आहे. जिल्ह्यात परतीच्या पावसाचा काही भागांत फटका बसला आहे. पाऊस चांगला राहिल्याने पण सरासरी उताराही चांगला राहिला आहे. नगदी पीक म्हणूनच शेतकरी सोयाबीनकडे पाहत आहेत. त्यात  आता दिवाळीचा सण जवळ येत आहे. त्यामुळे शेतकरी आपले सोयाबीन अडत बाजारात विक्रीसाठी आणत आहेत. दररोज ७० हजार क्विंटल सोयाबीनची आवक होत आहे. यापैकी ५० हजार क्विंटलचे माप करून त्याचे पैसेही दिले जात आहेत.

हमीपेक्षा जास्त भाव अडत बाजारात सोयाबीनची आवक वाढत चालली आहे. तरी देखील भाव चांगला आहे. आठ दहा दिवसांत पाचशे रुपयांपेक्षा अधिक भाव वाढला आहे. सोयाबीनचा हमीभाव तीन हजार ८८० रुपये प्रति क्विंटल आहे. तर येथील अडत बाजारात सोयाबीनला सरासरी चार हजार रुपयांपर्यंत भाव गेला आहे. त्यामुळे शेतकरी बाजारात सोयाबीन घेऊन येताना दिसत आहे.

जिल्ह्यात सोयाबीनचा पेरा दीडपटीने वाढला आहे. यात नैसर्गिक संकटामुळे वीस टक्के नुकसान धरले तरी सव्वा पटीने अधिक सोयाबीन बाजारात येणे अपेक्षित आहे. सध्या दररोज ७० हजार क्विंटल आवक आहे. ५० हजार क्विंटलचे माप होत आहे. सायंकाळी आलेल्या सोयाबीनचे दुसऱ्या दिवशी माप केले जाते. आणखी आवक वाढण्याची शक्यता आहे. भावही सध्या चांगला आहे. - ललितभाई शहा, सभापती, लातूर उच्चत्तम कृषी उत्पन्न बाजार समिती