पुणे विभागात रब्बीची ७२ टक्के पेरणी

पुणे ः परतीच्या उशिराने झालेल्या पावसाचा परिणाम रब्बीच्या पेरण्यांवर झाला आहे. यामुळे रब्बीच्या पेरण्या चांगल्याच खोळंबल्या होत्या. उशिराने काही प्रमाणात वाफसा झाला. त्यामुळे रब्बीच्या बऱ्यापैकी पेरण्या झाल्या आहे. पुणे विभागात आत्तापर्यंत १४ लाख ४९ हजार सात हेक्टरपैकी दहा लाख ४० हजार ४३८ हेक्टर म्हणजेच ७२ टक्के पेरण्या झाल्या आहेत, अशी माहिती कृषी विभागाच्या सूत्रांनी दिली.

यंदा चांगल्या झालेल्या पावसामुळे रब्बी पेरणीच्या क्षेत्रात वाढ होण्याचा अंदाज कृषी विभागाच्या सूत्रांचा होता. रब्बीच्या पेरणीस ऑक्टोबर ते नोव्हेंबर हा कालावधी चांगल्या असतो. मात्र, उशिराने झालेल्या पावसामुळे पुरेसा वाफसा न झाल्याने अनेक शेतकऱ्यांनी उशिराने पेरण्या करण्यास सुरवात केली. त्यामुळे मोठ्या प्रमाणात शेतकऱ्यांनी पेरणी केली. सध्या पिके वाढीच्या अवस्थेत आहेत. तर ज्वारी निसवण्याच्या अवस्थेत असून अनेक ठिकाणी ज्वारीवर चिकटा रोगांचा प्रादुर्भाव झाला आहे.

विभागात रब्बी हंगामातील ज्वारी पिके कणसामध्ये दाणे भरण्याच्या अवस्थेत आहेत. थंडीमुळे गहू पिकास पोषक वातावरण आहे. पीक वाढीच्या ते निसवण्याच्या अवस्थेत आहे. पिकांवर मावा किडीचा प्रादुर्भाव दिसून येतो. 

हरभरा पीक घाटे लागण्याच्या अवस्थेत आहे. तर काही ठिकाणी पिकांवर घाटे अळीचा प्रादुर्भाव दिसून येतो. मका पीक फुलोरा अवस्थेत असून त्यावर लष्करी अळीचा प्रादुर्भाव दिसून आला आहे. तर करडई पिकांची उगवण चांगली आहे. काही ठिकाणी मर रोगाचा प्रादुर्भाव आढळून आला आहे. सूर्यफूल पीक वाढीच्या अवस्थेत आहे. सुरू हंगामातील ऊस लागवडीची कामे सुरू आहे. त्यामुळे ऊस लागवडी मोठ्या प्रमाणात होण्याची शक्यता आहे. रब्बी कांदा पिकांची लागवड सुरू आहे.