अकोला जिल्ह्यात बीटी कपाशीची हवेत साडेसात लाख पाकिटे

अकोला ः या खरीप हंगामासाठी शासनाने एक मे पासूनच बीटी कापूस बियाणे उपलब्ध करून देण्याचे आदेश कृषी आयुक्तालयाने दिले आहेत. कोरोनाच्या पार्श्वभूमीवर हा निर्णय घेण्यात आला असून सेंद्रीय बोंड अळीला रोखण्यासाठी पूर्व हंगामी पेरणी होणार नाही याची काळजी घेण्याचे आवाहनही करण्यात आले आहे. या हंगामासाठी अकोला जिल्ह्याला किमान साडेसात लाख बीटी बियाण्याची पाकिटे लागणार आहेत.  मागील तीन-चार हंगामात सेंद्रीय बोंडअळीचा उद्रेक वाढल्याने उपाययोजना म्हणून पूर्व हंगामी पेरणी करण्यावर बंधन घालण्यात आले आहे. यामुळे दरवर्षी बीटी कपाशी  बियाण्याची विक्री २५ मे नंतर सुरु केली जात होती. सध्या कोरोनामुळे उदभवलेल्या परिस्थितीत शेतकऱ्यांना बियाणे मिळवताना अडचणी जाऊ नयेत, वितरण व्यवस्था सुरळीत व्हावी या उद्देशाने बियाणे विक्रीस एक मेपासूनच यंदा परवानगी देण्यात आली आहे. आगामी खऱीप हंगामात जिल्हयात कपाशीचे सरासरी एक लाख ५२ हजार हेक्टर क्षेत्र आहे. यंदा यासाठी बीटी कपाशीची सात लाख ५० हजार पाकिटे लागतील अशी शक्यता गृहीत धरत जिल्हा परिषद कृषी विभागाने मागणी नोंदविली आहे. बीटी बियाणे दरवर्षी नव्याने विकत घेऊन पेरले जाते. १०० टक्के बियाणे बदल होत असतो. यंदाच्या हंगामात १ लाख ५० हजार हेक्टरवर कपाशी लागवडीची शक्यता गृहीत धरून सात लाख ५० हजार पाकिटे लागतील, अशी शक्यता गृहीत धरण्यात आली.