केळीच्या पानांना शेकडा ८० रुपयांवर दर

जळगाव ः सणासुदीच्या दिवसांमध्ये केळीच्या पानांसह फुटव्यांना मोठी मागणी आहे. परंतु, यंदा जुनारी केळी बागा संपत आल्याने फुटव्यांसह पानांची उपलब्धता कमी आहे. ऐन मागणीच्या वेळेस तुटवडा असल्याने पुरवठादारांना बऱ्यापैकी दर मिळत आहेत. गुरुवारी (ता.१३) पानांना प्रतिशेकडा ८० रुपयांपर्यंत, तर फुटव्यांना प्रतिबंडल (१० फुटवे) २०० रुपये दर मिळाला. शहरात किरकोळ व्यावसायिकांनी आणखी अधिक दरात त्यांची विक्री केली.  रावेर, यावल, चोपडा, भुसावळ या भागात केळीची पाने व फुटवे सहज उपलब्ध होत आहेत. केळी उत्पादक गावांमधील मजूर व इतर मंडळी केळी पाने व फुटवे शेतांमधून काढून ती बाजारात विक्रीसाठी आणतात. जुनारी बागा रावेर, यावल, चोपडा भागात आहेत. जळगाव, पाचोरा, जामनेर भागात त्या फारशा नाहीत. कांदेबागमध्ये फुटवे, पाने उपलब्ध होत नाहीत. या बागा कापणीवर नुकत्याच आलेल्या असल्याने शेतकरी त्यात पाने व फुटवे कापू देत नाहीत. कारण झाडांचा बुंधा मजबूत होत नाही. घड हवे तसे पक्व होत नाहीत. बागेत उष्णता वाढते. यामुळे पाने व फुटव्यांचा पुरवठा कमी आहे.  पारोळा, अमळनेर, चाळीसगाव भागात ते उपलब्धच नाहीत. यामुळे तेथे अधिकचे दर आहेत. गणपती प्रतिष्ठापनेसाठी फुटव्यांना मागणी होती. शुक्रवारी (ता.१४) ऋषिपंचमी निमित्तही पाने व फुटव्यांची मोठी मागणी दिसून आली. जळगावात शुक्रवारी घाणेकर चौक, वल्लभदास वालजी व्यापारी संकुल, सुभाष चौक व इतर उपनगरांमध्ये जवळपास पाने व फुटव्यांची विक्री सुरू होती. जळगावात यावल तालुक्‍यातील डांभुर्णी, चोपडामधील धानोरा, देवगाव, पुनगाव, मितावली भागातून यासह जळगाव तालुक्‍यातील विदगाव, आमोदे बुद्रुक, नांद्रा बुद्रुक, खेडी खुर्द भागातून केळी पाने व फुटव्यांचा पुरवठा झाला.