बुलडाण्यात ८९ हजार हेक्टर बाधित

बुलडाणा : जिल्ह्यात गेल्या आठवड्यात तीन दिवस झालेल्या अतिवृष्टीने सुमारे ८९ हजार हेक्टरवरील पिकांचे नुकसान झाल्याचा प्राथमिक अंदाज आहे. १६ ते १८ ऑक्टोबर या काळात जिल्ह्यात प्रामुख्याने १९ मंडलांमध्ये अतिवृष्टी होऊन पिकांचे अतोनात नुकसान झाले होते. यातही मुख्यत्‍वे करून घाटावरील लोणार, मेहकर, सिंदखेडराजा या तालुक्यांमध्ये नुकसान झालेले आहे. १६ ते १८ ऑक्टोबर असे सलग तीन दिवस पाऊस झाला. या पावसात सुमारे २२३ गावांतील शेतीला फटका बसला. यात मेहकर तालुक्यातील १३० गावांचा समावेश आहे. या तालुक्यात ४९ हजार ४११ हेक्टरवरील सोयाबीन, कापूस पिकांचे नुकसान झाले आहे. लोणार तालुक्यात १७ हजार ४७७ तर सिंदखेडराजा तालुक्यात २२५०७ हेक्टरवरील सोयाबीन, कापूस, तूर पिकाचे नुकसान झाले आहे. तीन दिवसांतील या पावसात मेहकर, जानेफळ, हिवरा, डोणगाव, देऊळगाव, वरवंड, लोणी, अंजनी, सुलतानपूर, बिबी, हिरडव, अंजनी, साखरखेर्डा, शेंदुर्जन, किनगावराजा, उंद्री, मेरा आदी मंडलांमध्ये अतिवृष्टी झाली. सध्या जिल्ह्यात सोयाबीनची काढणी अंतिम टप्प्यात आली आहे. अनेक शेतकऱ्यांनी सोंगणी केलेले तसेच सुडी लावून ठेवलेले सोयाबीनचे नुकसान झाले. सोयाबीनच्या शेंगामधून कोंब निघाले. कृषी, महसूल विभागाकडून संयुक्त पंचनामे झाल्यानंतरच या नुकसानाची अंतिम आकडेवारी मिळणार असल्याचे प्रशासनाकडून सांगण्यात आले. जिल्ह्यात या खरीप हंगामात सातत्याने नुकसान झालेले आहे. पावसाच्या चारही महिन्यांत नुकसान झालेले असतानाच परतीच्या पावसानेही जोरदार तडाखा दिला आहे. नुकसान लक्षात घेता शासनाने तातडीने ओला दुष्काळ जाहीर करावा, अशी विविध राजकीय पक्ष, संघटनांकडून मागणी केली जात आहे. आधीची मदत केव्हा मिळणार या हंगामात प्रत्येक महिन्यात पाऊस, पुराच्या पाण्याने पिकांचे नुकसान झालेले आहे. शासनाकडे याचे अहवालही सादर झालेले आहेत. परंतु संपूर्ण भरपाई अद्यापही शेतकऱ्यांना मिळालेली नाही. संकटांची ही मालिका संपूर्ण खरीप हंगामात कायम होती. नुकसान भरपाई शासन, विमा कंपनी केव्हा देणार, असा प्रश्‍न शेतकऱ्यांकडून केला जात आहे.