सिंधुदुर्ग जिल्ह्यातील ९० टक्के भातपिकांना लोंबी

सिंधुदुर्ग ः जिल्ह्यातील ९० टक्के भातपिकांना लोंबी आली आहे. तर १० टक्के हळवी भातपिके परिपक्व झाली आहेत. गेल्या आठ ते दहा दिवसांत झालेल्या शेती उपयुक्त पावसामुळे भातशेतीवरील संकट टळले आहे. त्यामुळे शेतकऱ्यांमध्ये समाधानाचे वातावरण आहे.

जिल्ह्यात ५५ हजार हेक्टरवर भातशेतीची लागवड केली जाते. खरीप हंगामात भातशेतीचे अधिक प्रमाणात केली जाते. साधारणपणे तीन टप्प्यात पेरणी आणि भातरोपे लावणी होते. ज्या शेतकऱ्यांकडे पाण्याची सुविधा असते असे शेतकरी माॅन्सूनपूर्वी पाऊस पडण्याच्या अगोदर आठ ते दहा दिवस भिजवणीची पेरणी करतात. त्यानंतर माॅन्सूनपूर्व पाऊस पडल्यानंतर पेरणी केली जाते तर काही शेतकरी मृगाचा पाऊस पडल्यानंतर पेरणी करतात.

यावर्षी २० मे रोजी भिजवणीची पेरणी करण्यात आली. तर १ जून ते ४ जून या कालावधीत माॅन्सूनपूर्व पेरणी करण्यात आली. तर १० जूनच्या पुढे माॅन्सून सुरू झाल्यानंतर भात बियाणे पेरण्यात आले. त्यानंतर भातशेतीला अतिशय चांगला पाऊस झाला. रोपे लागवड करताना देखील शेतकऱ्यांचा खोळंबा पावसामुळे झालेला नाही. त्यामुळे भातरोपे लागवड वेळेत पूर्ण झाली. त्यानंतर सतत पाऊस झाला. त्यामुळे रोपांची वाढ चांगली झाली आहे. परंतु ऑगस्टच्या अखेरीस पावसाने दडी मारली सलग आठ ते दहा दिवस पाऊस गायब झाला. पावसाअभावी भातशेतीच्या जमिनीतील ओलावा कमी होऊ लागला होता. त्यातच करप्याचा प्रादुर्भाव भातपिकांवर झाला.

त्यामुळे शेतकऱ्यांमध्ये चिंतेचे वातावरण निर्माण झाले होते. परंतु त्यानंतर पावसाला सुरुवात झाली. भातशेती धोक्यात येण्यापूर्वी पाऊस झाला. त्यामुळे भातशेतीवरील मोठे संकट टळले. सध्या जिल्ह्यातील ९० टक्के भातपिकांना लोंबी आलेली आहे. त्यातील १० टक्के भातबियाणे असल्याने ती परिपक्व झाली आहेत. परिपक्व झालेली भातशेती येत्या सहा ते सात दिवसांत कापणीला येण्याची शक्यता आहे. परंतु सध्या पावसाचे सावट आहे.