जळगावमध्ये ई-पॉसचे ९० टक्के काम पूर्ण

जळगाव ः जिल्ह्यात खतांची विक्री ई-पॉस (पॉइंट ऑफ सेल) मशिनने करण्यास सुरवात झाली; पण अनेक ठिकाणी आधार क्रमांक लिंक न होणे, सर्व्हर डाउन अशा अडचणी आल्या. त्यातच खत विक्रेते बंदच्या तयारीत असल्याने अनेक ठिकाणचे वस्तुनिष्ठ अहवाल बुधवारी (ता. १) मिळू शकले नाही; परंतु जिल्ह्यात ई-पॉसचे काम ९० टक्के झाले असून, त्याचे कौतुक राज्याचे कृषी आयुक्त सचिंद्र प्रतापसिंह यांनी बुधवारी झालेल्या व्हिडिओ कॉन्फरन्समध्ये केल्याची माहिती अधिकाऱ्यांनी दिली.        ई-पॉस लागू करण्यासंबंधी राज्य शासनाने आदेश दिल्यानंतर जिल्ह्यात मागील आठवडाभर गतीने कार्यवाही झाली. त्यात काही विक्रेत्यांकडे मागील महिन्यातच ई-पॉस मशिन बसविले होते. त्यांनी त्या मशिनच्या आधारे खत विक्री सुरू केली होती; परंतु काही विक्रेत्यांकडे मशिन नव्हते. ती संबंधित खत कंपन्यांकडून मागवून बसविण्याची कार्यवाही झाली. आजघडीला ९० टक्के काम पूर्ण झाल्याची माहिती बुधवारी कृषी आयुक्तांसोबतच्या व्हिडिओ कॉन्फरन्समध्ये देण्यात आली. त्याचे आयुक्त यांनी कौतुक केले.  जिल्ह्यात ई-पॉस बसविण्यासंबंधीचा पहिला टप्पा पूर्ण होत आला असून, आता फक्त सात कृषी केंद्रांवर सात ई-पॉस मशिनची गरज आहे. तांत्रिक अडचणी कायम कृषी आयुक्तांसोबत झालेल्या व्हिडिओ कॉन्फरन्समध्ये तांत्रिक अडचणींचाही मुद्दा निघाला. त्यावर आयुक्त यांनी प्रथम कृषी विभागाने टेक्‍नोसेव्ही व्हावे, तंत्रज्ञान आत्मसात करून त्याची प्रभावी अंमलबजावणी करावी, अशा सूचना दिल्या. यातच जिल्ह्यात अजूनही अनेक खत विक्रेत्यांकडे ई-पॉस मशिनवर आधार क्रमांक लिंक न होणे, सर्व्हर डाउनमुळे कामकाज थांबणे, अशा अडचणी येत आहेत, असे कृषी अधिकारी शिंपी यांनी स्पष्ट केले.