गोजेगाव, जि. हिंगोली : पूर्णा नदीवरील औंढा नागनाथ तालुक्यातील सिद्धेश्वर धरणामध्ये गुरुवारी (ता. २१) सकाळी आठ वाजता ९२.५० टक्के (२.६४ टीएमसी) उपयुक्त पाणीसाठा उपलब्ध झाला होता. यंदा येलदरी पाठोपाठ सिद्धेश्वर धरणामध्ये देखील पुरेशा प्रमाणात पाणीसाठा उपलब्ध झाल्यामुळे रब्बी पिकांसाठी तसेच उन्हाळी हंगामातील सिंचन आवर्तनाची खात्री निर्माण झाल्याने लाभक्षेत्रातील शेतकऱ्यांमधून समाधान व्यक्त केले जात आहे.
ऑक्टोबर महिन्याच्या सुरवातीच्या काही दिवसांमध्ये सिद्धेश्वर धरणामध्ये उणे पाणीसाठा होता. परंतु, त्यानंतर पाणलोट क्षेत्रात झालेल्या जोरदार पावसामुळे खडकपूर्णा भरल्यामुळे नदी पात्रात विसर्ग सुरू करण्यात आला. त्यामुळे येलदरी धरण शंभर टक्के भरले आहे. येलदरी धरणातील वीजनिर्मिती केंद्रातून नदी पात्रात पाण्याचा विसर्ग सुरू आहे. त्यामुळे सिद्धेश्वर धरणातील पाणीसाठ्यात मोठी वाढ झाली.
गुरुवारी (ता. २१) सकाळी आठ वाजता सिद्धेश्वर धरणामध्ये २.६४ टीएमसी (९२.५० टक्के) उपयुक्त पाणीसाठा उपलब्ध झाला होता. त्यामुळे यंदा रब्बी तसेच उन्हाळी हंगामातील सिंचनासाठी कालव्याव्दारे पाणी आवर्तनाची खात्री झाली आहे. अनेक गावांच्या पाणीपुरवठ्याचा प्रश्न निकाली निघाला आहे. सिंचनासाठी पाणी उपलब्ध झाल्यामुळे खरीप हंगामातील नुकसानीची कसर रब्बी आणि उन्हाळी हंगामात भरून काढता येईल, या आशेने लाभ क्षेत्रातील शेतकरी समाधान व्यक्त करत आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.