राज्यातील साखर कारखान्यांकडून एफआरपीचे ९९ टक्के वाटप

पुणे: राज्यातील साखर कारखान्यांनी लॉकडाउन आणि घसरलेल्या साखरदराच्या समस्येला तोंड देत आत्तापर्यंत ९९ टक्के एफआरपी अदा केली आहे. १४४ साखर कारखान्यांनी यंदा ५५०.१७ लाख टन ऊस गाळप केले. कायद्यानुसार शेतकऱ्यांना १३ हजार ८९१ कोटी रुपये देण्याची आवश्यकता होती. कारखान्यांनी उत्तम नियोजन करीत आत्तापर्यंत १३ हजार ७५९ कोटी रुपये अदा केले आहेत.  चालू हंगामातील थकीत एफआरपीची रक्कम आता अवघी १३२ कोटीची असून ती एकूण एफआरपीच्या एक टक्क्यापेक्षा कमी आहे. मात्र, मागील हंगामातील ३८९ कोटी रुपये अजूनही शेतकऱ्यांना देण्यात आलेले नाहीत. कराराप्रमाणे चालू हंगामाचे अजून ५०० कोटी रुपये द्यायचे आहेत. मात्र, करार असल्यामुळे ती रक्कम थकीत एफआरपी म्हणून गणली जात नाही.  ‘‘२०१८-१९ च्या हंगामात राज्यात ९५२ लाख टन ऊस गाळला होता. त्यामुळे शेतकऱ्यांना २२ हजार ५०० कोटी रुपयांपेक्षा जास्त पेमेंट वाटले गेले होते. २०१९-२० च्या हंगामात ऊस उत्पादन ४०२ लाख टनाने घटले. उत्पादन घटल्याने शेतकऱ्यांना यंदा ८ हजार ९४० कोटी रुपये कमी मिळाले आहेत,’’ अशी माहिती सूत्रांनी दिली.  राज्यात यंदा १०० टक्के एफआरपी वाटणाऱ्या कारखान्यांची संख्या १२० झाली आहे. गेल्या हंगामात याच कालावधीत थकीत एफआरपीची रक्कम ६५५ कोटीची होती. मात्र, शेतकऱ्यांना वाटली गेलेली रक्कम २२ हजार कोटीची होती. ‘‘लॉकडाउन असतानाही कारखान्यांनी चांगली कामगिरी बजावली आहे. शेतकऱ्यांशी करार करीत आर्थिक नियोजनाची काळजी देखील कारखान्यांनी घेतली. त्यामुळे यंदा राज्यातील कोणत्याही कारखान्याला आरआरसी (महसूल वसुली प्रमाणपत्र) कारवाईला सामोरे जावे लागले नाही,’’ असे साखर कारखाना उद्योगातून सांगण्यात आले.

प्रतिक्रिया राज्यातील साखर कारखान्यांची यंदा एफआरपी बाकी आता एक टक्का इतकीच दिसते आहे. मात्र, कराराप्रमाणे ५०० कोटी रुपये द्यायचे आहेत. शेतकऱ्यांनी यंदा कारखान्यांशी मोठ्या प्रमाणात करार केले आहेत. या करारानुसार ही बाकी आता कमी दिसते आहे. - शेखर गायकवाड , साखर आयुक्त