औरंगाबाद : मराठवाड्यातील सोयगाव, देगलूर, बिलोली, धर्माबाद हे चार तालुके वगळता सर्व तालुक्यात सोमवारी (ता.१) पावसाने हजेरी लावली. त्यामुळे शेत शिवारातील लगबग वाढली. कपाशीच्या मान्सून पूर्व लागवडीसह पेरणीपूर्व मशागतीच्या कामांना व बियाणे, खते खरेदीला वेग आला आहे.
मराठवाड्यातील लातूर व औरंगाबाद या दोन कृषी विभागाअंतर्गत आठ जिल्ह्यांत जवळपास ४८ लाख १९ हजार हेक्टरवर खरिपाची पेरणी अपेक्षित आहे. त्यामध्ये सर्वाधिक २० लाख हेक्टर क्षेत्र सोयाबीनचे या पाठोपाठ १५ लाख हेक्टर कापूस, जवळपास ३ लाख हेक्टर मका, ४ लाख ५९ हजार हेक्टर तूर, १ लाख ५४ हजार हेक्टर मूग, १ लाख ५० हजार हेक्टर उडीद, १ लाख १४ हजार हेक्टर ज्वारी आदी प्रमुख पिकांची पेरणी अपेक्षित आहे.
सोमवारी (ता.१) सकाळपर्यंतच्या चोवीस तासात उस्मानाबाद जिल्ह्यातील भूम तालुकाअंतर्गत येत असलेल्या वालवड मंडळात सर्वाधिक ७० मिलिमीटर पाऊस झाला. त्यापाठोपाठ औरंगाबाद जिल्ह्यातील वैजापूर तालुक्यातील वैजापूर मंडळात ६७ मिलिमीटर पाऊस झाला. मराठवाड्यातील वैजापूर, पाथरी, भूम, माजलगाव तालुक्यात सरासरी ३० मिलिमीटरच्या पुढे पाऊस झाला. तर, वाशी, परळी, वडवणी, आष्टी, अंबड, गंगापूर, पैठण तालुक्यात सरासरी २० ते ३० मिलिमीटर दरम्यान पाऊस झाला.
परभणी जिल्ह्यातील पाथरी तालुक्यात सर्वाधिक सरासरी ४२.३३ मिलिमीटर पावसाची नोंद झाली. काही ठिकाणी दमदार स्वरुपाच्या झालेल्या पावसामुळे उन्हाळ्यातील मशागती झालेल्या शेतांमध्ये पेरणीपूर्व कोळपणीची कामे शेतकऱ्यांनी हाती घेतली आहेत. अनेक ठिकाणी वादळासह आलेल्या या पावसाने आंबा पिकाचे मोठे नुकसान केले. काही ठिकाणी रस्त्यालगतच्या झाडे वादळाने उन्मळून पडली. अनेकांच्या घरावरील टिनपत्रे वादळाने उडून गेले. परंतु, काही ठिकाणी नुकसान करणाऱ्या पावसाने पेरणीपूर्व मशागतीच्या कामासह बियाणे व खते खरेदीच्या कामाला वेग देण्याचे काम केले आहे. घरच्या सोयाबीनची चाचणी
सोयगाव तालुक्यातील तिडका शिवारात आले. कृषी विद्यापीठाच्या तज्ञांसह विविध व्यासपीठाद्वारे कोरोना संकटाच्या पार्श्वभूमीवर ऑनलाइन मार्गदर्शनातून यंदाच्या खरिपाचे नियोजन करण्याचे काम शेतकरी करतो आहे. खरिपाची सोय लावण्यासाठी पीक कर्ज मागणीसाठी ऑनलाइन अर्ज करण्याच्या प्रशासनाच्या आवाहनालाही प्रतिसाद देण्यासाठी शेतकऱ्यांची अनेक सुविधा केंद्रावर गर्दी पाहायला मिळते आहे. अनंत अडचणींचा सामना करूनही शेतकरी मोठ्या आशेने खरिपाच्या तयारीला लागल्याचे चित्र आहे. सोयाबीनचे घरचे बियाणे वापरण्यासाठी त्याची उगवण क्षमता तपासण्याचे काम शेतकरी करीत आहेत.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.