पाथरूडमध्ये सोयाबीन मळणीच्या कामांना वेग

पाथरुड, जि. उस्मानाबाद  : मागील आठ - दहा दिवसांपासून पाथरूडसह परिसरात पावसाने उघडीप दिली आहे. पावसामुळे रखडलेली उडीद पिकाची काढणी अंतीम टप्प्यात आली आहे. सोयाबीन काढणी व मळणीच्या कामाने वेग घेतला आहे.  

गत पंधरा दिवसांपासून पावसामुळे नूकसान झालेल्या सोयाबीन पिकाचे पंचनामे सुरू आहेत. शेतात उभ्या पिकांचे ऑनलाइन तक्रार केलेल्या पिकांचे पंचनामे होत आहेत. पंचनामे झाल्यानंतर सोयाबीन काढणीला वेग आला आहे. परतीच्या पावसामुळे काढणीस आलेल्या सोयाबीन पिकाचे नुकसान होऊ नये म्हणून शेतकरी कामात व्यस्त आहेत. मागील आठवड्यात भिजलेल्या उडीद पिकास बाजारपेठेत चांगला भाव मिळत नसल्याने शेतकरी अडचणीत सापडला आहे. 

सोयाबीन काढणीसह रब्बी हंगामातील पेरणीसाठी शेतातील गवत काढणे सुरू असल्याने मजुराची कमतरता भासत आहे. अव्वाच्यासव्वा पैसे देऊन शेतातील कामे करावी लागत आहेत. सोयाबीन काढणी व मळणीची कामे जोरात सुरु असताना गेल्या दोन दिवसांपासून आकाशात पुन्हा काळे ढग येऊ लागल्याने शेतकऱ्यात धाकधुक वाढली आहे. काढलेले सोयाबीनची गंजी लावून ताडपत्री व प्लास्टिक कागदाने झाकण्यासाठी शेतकऱ्याची धावपळ होत असल्याचे दिसून येत आहे. 

गतवर्षाप्रमाणे परतीच्या पावसाने काढलेल्या सोयाबीनचे नुकसान होऊ नये म्हणून गंज शेतात लावली आहे. अतिपावसामुळे जमिनीत जास्त ओलावा आहे. त्यामुळे ट्रॅक्टरचे मळणी यंत्र चिखलामुळे शेतात नेहणे आवघड होत आहे. गेल्या दोन दिवसांपासून ढगाळ वातावरण तयार होत आसल्याने हातातोंडाशी आलेला घास जातो की काय याची भिती वाटू लागली आहे. - सोमनाथ बोराडे, शेतकरी पाथरूड