वाशीममध्ये ‘पोकरा’च्या कामांना गती द्यावी ः जिल्हाधिकारी

वाशीम : जागतिक बँक अर्थसहाय्यीत नानाजी देशमुख कृषी संजीवनी प्रकल्पा (पोकरा)च्या कामांना गती द्यावी. प्रकल्पासाठी निवडण्यात आलेल्या गावांमधील शेतकऱ्यांची नोंदणी प्रक्रिया लवकरात लवकर पूर्ण करावी. ग्राम कृषी संजीवनी समिती आणि कृषी सहायक स्तरावर प्रलंबित असलेले अर्ज तातडीने निकाली काढण्याचे निर्देश जिल्हाधिकारी शण्मुगराजन एस. यांनी यंत्रणांना दिले.

नवनियुक्त जिल्हाधिकाऱ्यांनी गुरुवारी (ता. २९) ‘पोकरा’ प्रकल्पाची आढावा बैठक घेतली. यावेळी जिल्हा अधीक्षक कृषी अधिकारी व ‘आत्मा’ प्रकल्प संचालक शंकर तोटावार, जिल्हा परिषद उपमुख्य कार्यकारी अधिकारी (पंचायत) कालिदास तापी, जिल्हा अग्रणी बँकेचे व्यवस्थापक दत्तात्रय निनावकर, जिल्हा कृषी विकास अधिकारी श्री. बनसोड, उपविभागीय कृषी अधिकारी दत्तात्रय चौधरी यांच्यासह सर्व तालुका कृषी अधिकारी उपस्थित होते.

जिल्हाधिकारी शण्मुगराजन एस. म्हणाले की, जिल्ह्यातील १४९ गावांची नानाजी देशमुख कृषी संजीवनी प्रकल्पामध्ये निवड झाली आहे. यापैकी सूक्ष्म नियोजन प्रक्रिया पूर्ण होऊन प्रकल्प आराखडा मंजूर झालेल्या गावांमधील कामे लवकरात लवकर पूर्ण करावीत. निवड झालेल्या गावांमधील प्रत्येक पात्र शेतकऱ्याची नोंदणी ‘पोकरा’च्या पोर्टलवर होणे आवश्यक असून, या कामाला गती द्यावी. ज्या तालुक्यांमधील नोंदणी कमी आहे, तेथील तालुका कृषी अधिकाऱ्यांनी विशेष लक्ष घालून मोहीम स्वरुपात नोंदणीची प्रक्रिया पूर्ण करावी.

शेतकऱ्यांना स्वतः अथवा कॉमन सर्व्हिस सेंटरमध्ये जाऊन सुद्धा आपली नोंदणी करून मागणी नोंदविता येते. संबंधित गावाच्या समूह सहाय्यकांनी यासाठी शेतकऱ्यांना मार्गदर्शन करावे. ग्राम कृषी संजीवनी समिती आणि कृषी सहाय्यकांच्या स्तरावर शेतकऱ्यांचे अर्ज प्रलंबित राहणार नाहीत, याची दक्षता घेत आजपर्यंत प्राप्त झालेले अर्ज दिवाळीपूर्वी निकाली काढावेत, असेही जिल्हाधिकारी म्हणाले.