राजस्थान, मध्य प्रदेशातून गव्हाच्या आवकेत वाढ

जळगाव : बाजार समितीमधील किरकोळ व घाऊक विक्रेते, व्यापाऱ्यांकडे राजस्थान, मध्य प्रदेशातून गव्हाची आवक वाढली आहे. गहू दरांवर मागील सात-आठ दिवसात दबाव वाढला आहे. लोकवन गव्हाचे दर प्रतिक्विंटल १९०० ते २१०० रुपये प्रतिक्विंटलपर्यंत आहेत. 

स्थानिक क्षेत्रातून गव्हाची आवक कमी आहे. मध्य प्रदेश व राजस्थानमधील मोठ्या व्यापाऱ्यांकडून बाजार समितीमधील खरेदीदार गव्हाचा पुरवठा करून घेत आहेत. चंदोसी, वनफोरसेव्हन प्रकारचा गहू परराज्यातून अधिक येत आहे. मध्य प्रदेशातील बुंदेलखंड भागातून लोकवन प्रकारचा गहू येत आहे. मागील महिन्याच्या सुरवातीला गव्हाचे दर २००० ते २२५० रुपये प्रतिक्विंटलपर्यंत होते.

गव्हाची पेरणी चोपडा, यावल, जळगाव, रावेर व मुक्ताईनगर भागात अधिक झाली होती. याच भागातून लोकवन व वनफोरसेव्हन प्रकारच्या गव्हाची आवक सुरू होती. स्वच्छ केलेल्या लोकवन गव्हासाठी शेतकऱ्यांना २३५० रुपयांवर दर मिळाले होते. वनफोरसेव्हन प्रकारच्या गव्हाचे दर ३००० रुपये प्रतिक्विंटलपर्यंत मिळाले.  

चोपडा व यावल भागात काही खरेदीदारांनी थेट शेतात जाऊन गव्हाची खरेदी करून घेतली. यात शेतकऱ्यांचा गोण्यांमध्ये गहू भरण्यासह तो बाजारात पोचविण्याचा खर्च वाचला. परंतु परराज्यातून आवक वाढली, तसा दरांवरील दबावही अधिक झाला. दरात मागील सात-आठ दिवसांत कुठलीही सुधारणा झालेली नाही. सध्या जळगाव, चोपडा, अमळनेर येथील बाजार समितीत स्थानिक क्षेत्रातील गव्हाची आवक कमी आहे. काही शेतकऱ्यांनी चांगल्या दरांसाठी गव्हाचा साठा करून घेतला आहे, असे सांगण्यात आले.