साताऱ्यातील धरणात मुबलक पाणीसाठा 

सातारा: जिल्ह्यातील प्रमुख धरणात मुबलक पाणीसाठा असल्याने टंचाईच्या झळा कमी होणार आहे. कण्हेर धरणाचा अपवाद वगळता इतर सर्व प्रमुख धरणात ४० टक्के पाणीसाठा उपलब्ध आहे. राज्याच्या वीज निर्मितीची दृष्टीने महत्वाचे असलेल्या कोयना धरणात ४४.८४ टक्के पाणी शिल्लक आहे. मॉन्सूनची हजेरी वेळेत झाल्यास झाल्यास यावर्षी धरणातील दरवाजे लवकर उघडावे लागलीत. यामुळे गतवर्षीप्रमाणे पूरस्थिती निर्माण होण्याची भिती व्यक्त केली जात आहे.  जिल्ह्यात गतवर्षी मोठ्या प्रमाणात पाऊस झाल्याने सर्वच धरणात मोठ्या प्रमाणात पाण्याची आवक झाली होती. यामुळे शेकडो टीएमसी पाणी विनवापर नदी पात्रात सोडण्यात आले होते. दमदार पाऊस आणि पाण्याचा विसर्ग यामुळे जिल्ह्यातील पाटण, कऱ्हाड तसेच सांगली जिल्ह्यातील अनेक गावांना पूरपरिस्थितीला सामोरे जावे लागले होते. यामुळे कोट्यावधी रुपयांचे नुकसानही सहन करावे लागले आहे. गतवर्षीचा मान्सूनचा मुक्काम वाढल्याने धरणातील पाणीसाठा कमी झाला नाही. तसेच शेतीला पाण्याची गरजही कमी झाली होती. यामुळे मे महिना सुरू झाला असलातरी धरणात मुबलक पाणीसाठा शिल्लक आहे.  राज्याच्या वीजनिर्मीतीच्या दृष्टीने महत्वाचे असलेल्या कोयना धरणात ४७.२० टीएमसी म्हणजेच ४४.८४ टक्के पाणीसाठा शिल्लक आहे. गतवर्षीच्या तुलनेत हा पाणीसाठा जास्त आहे. यावर्षी मान्सूनने वेळेत हजेरी लावल्यास या धरणातील पाण्याचा विसर्ग नेहमीपेक्षा अगोदर करावा लागणार आहे. यामुळे पुरस्थितीची भिती आहे. यामुळे शिल्लक पाणीसाठा व पावसाचे प्रमाण यावर कोटेकोरपणे नियोजन करावे लागणार आहे. उरमोडी धरणातही ७४ टक्के पाणीसाठा शिल्लक असल्याने माण, खटाव या दुष्काळी तालुक्यांना फायदेशीर ठरणार आहे. कोयनासह इतर प्रमुख धरणातही मुबलक पाणीसाठा शिल्लक आहे. यामध्ये धोम धरणात ४८.९५ टक्के, कण्हेर ३५.५३, धोम-बलकवडी ४४.०५, उरमोडी ७४.७७, तारळी ४५.९५ टक्के पाणीसाठा शिल्लक आहे. 

प्रमुख धरणातील पाणीसाठा (टीएमसी)  कोयना- ४७.२०, धोम ६.६१, कण्हेर ३.५९, धोम-बलकवडी १.८०, उरमोडी ७.४५, तारळी २.८६.