प्राथमिक शिक्षकांच्या प्रशासकीय बदल्या रद्द

कुसुंबा, जि. धुळे ः सर्वांत मोठा नोकर वर्ग म्हणून प्राथमिक शिक्षकांकडे पाहिले जाते, त्यांची संख्या जास्त म्हणून बदल्यांचा प्रश्नही तेवढाच किचकट मानला जातो. यावर्षी देखील प्राथमिक शिक्षकांचा प्रश्न चर्चेचा ठरला आहे. कोरोनाच्या आपत्ती काळांत प्राथमिक शिक्षकांच्या प्रशासकीय बदल्या रद्द करण्यात आल्याने शिक्षकांना दिलासा मिळाला आहे. केवळ विनंती बदल्या करण्याचे आदेश राज्य शासनाच्या ग्रामविकास विभागाने दिले आहेत.

हा आदेश येण्यापूर्वी ग्रामविकास विभागाने शिक्षकांच्या प्रशासकीय व विनंती बदल्या करण्याचे निर्देश दिले होते. या बदल्या सुमारे १५ टक्‍केपर्यंत होणार असल्याने मोठ्या प्रमाणावर शिक्षकांच्या गैरसोय होणार होती. शिवाय या बदल्या ऑफलाइन होणार असल्याने प्राथमिक शिक्षक संघाने टिकेची झोड उठवली होती. कोरोना महामारीच्या काळात एवढ्या मोठ्या प्रमाणात शिक्षकांना जिल्‍हा परिषदेत बोलावणे देखील धोकादायक होते. 

प्राथमिक शिक्षक संघाच्या पदाधिकाऱ्यांनी ग्रामविकास मंत्री हसन मुश्रीफ यांच्याशी वेळोवेळी पाठपुरावा केला. शिक्षक हिताच्या बदल्यांबाबत आग्रही भूमिका घेतली. शिक्षकांच्या प्रशासकीय बदल्या रद्द व्हाव्यात, यासाठी राष्र्टवादी कॉंग्रेस पक्षाचे अध्यक्ष शरद पवार यांच्याकडेही सातत्याने पाठपुरावा केला. त्यांच्या सूचनेनुसार चक्रे फिरली.

मुश्रीफ यांनी शिक्षक संघाच्या पदाधिकाऱ्यासमवेत बैठक घेऊन शिक्षकांच्या बदली संदर्भात सविस्तर चर्चा केली. त्यानुसार प्रशासकीय बदल्या रद्द करण्यात आल्या. केवळ अपंगसंवर्ग, पती - पत्नी एकत्रीकरण, अवघड क्षेत्रांतील कार्यरत शिक्षकांच्या विनंती बदल्या करण्याबाबतचा आदेश देण्यात आला. 

संघाचे नेते संभाजीराव थोरात, राज्य अध्यक्ष बाळासाहेब तांबारे, उपाध्यक्ष संजय पोतदार, जिल्हाध्यक्ष गमन पाटील, सरचिटणीस शरद पाटील, जिल्हा नेते मनोहर शिंदे यांच्या प्रयत्नाला यश मिळाले.