कोल्हापूर : नोकर भरती वरून वादग्रस्त ठरलेल्या येथील बाजार समितीवर अखेर प्रशासकाची नियुक्ती करण्यात आली आहे. बुधवारी (ता. ५) दुपारी कोल्हापूर शहर उपनिबंधक प्रदीप मालगावे यांची प्रशासक म्हणून नियुक्ती करण्यात आली.
सग्यासोयऱ्यांना नोकरी लावण्याच्या कारणावरून गेली काही दिवस बाजार समितीचे वातावरण तापले होते. काही संचालकांनी इतर संचालकांच्या विरोधात तक्रार केल्यानंतर समिती स्थापन करण्यात आली होती. या समितीचा अहवाल येण्या अगोदरच सोमवारी (ता. ४) १४ संचालकांनी तर मंगळवारी (ता. ५) सभापती उपसभापतीनी राजीनामे दिले. संचालकांची मुदत ही बुधवारी (ता. ५) संपत होती. या पार्श्वभूमीवर समितीवर प्रशासकाची नियुक्ती करण्यात आली आहे. यामुळे सध्या तरी इतर पर्यायांचा मार्ग बंद झाला आहे.
शेती उत्पन्न बाजार समिती नोकर भरती तसेच जागा हस्तांतरण व्यवहार बेकायदेशीरपणे झाल्याच्या तक्रारी शिवसेनेचे संचालक प्रतिनिधी ॲड. किरण पाटील, भाजपचे नाथाजी पाटील, भगवान काटे आदींनी जिल्हा निबंधकांकडे केल्या होत्या. त्याची दखल घेत जिल्हा निबंधकांनी तीन अधिकाऱ्यांच्या समितीतर्फे बाजार समितीची चौकशी सुरू केली आहे.
या चौकशी समितीचा अहवाल तयार होत आहे. यात संचालक मंडळ बरखास्तीची शक्‍यता अधिक असल्याची बाब विचारात घेऊन बहुतांशी संचालकांनी जिल्हा निबंधकांकडे राजीनामे दिले. त्यापाठोपाठ उपसभापतीनी आपला राजीनामा सभापतींकडे दिला. सभापतींनी आपला राजीनामा जिल्हा उपनिबंधकांकडे दिला आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.