विजयानंतर रोहित पवार थेट राम शिंदेच्या घरी

नगर ः विधानसभा निवडणुकीत विजयी झाल्यानंतर निवडून आलेले उमेदवार आपल्या विरोधकांना कसे अस्मान दाखवले हे दाखवण्याचा प्रयत्न करत असतात. मात्र, कर्जत- जामखेड विधानसभा मतदारसंघातून विजयी झालेल्या रोहित पवार यांनी मात्र दिग्गज मंत्र्याला पराभूत केल्यानंतरही विजयोन्माद न करता सुसंस्कृतपणाचे दर्शन घडवले. विजयानंतर रोहित पवार थेट पालकमंत्री राम शिंदे यांच्या घरी जाऊन त्यांचे व त्यांच्या मातोश्रीचे आशीर्वाद घेतले. शिंदे यांनीही पवार यांचे फेटा बांधून स्वागत केले. राज्यभर या अनोख्या सुसंस्कृत राजकारणाची चर्चा होत आहे. 

राज्य सरकारमध्ये प्रमुख मंत्री, नेते असलेले राम शिंदे यांच्याशी राष्ट्रवादीचे अध्यक्ष शरद पवार यांचे नातू रोहित पवार यांची लढत होत असल्याने राज्याच्या प्रमुख लढतीत कर्जत-जामखेडकडे लक्ष लागलेले होते. येथे झालेल्या सरळ लढतीत मंत्री राम शिंदे यांना पराभूत व्हावे लागले. विजयी झाल्यानंतर विजयोन्माद साजरा करताना निवडून आलेले विरोधकांना कसे लोळवले याचे वर्णन करतात याचाच सहसा अनुभव आहे. मात्र, रोहित पवार यांनी विजयोन्माद न करता विजयानंतर थेट राम शिंदे यांचे घर गाठून आपल्या सुसंस्कृतपणाचे दर्शन घडवले. 

गुरुवारी दुपारी निकाल जाहीर झाल्यानंतर रोहित यांनी कर्जतहून जामखेडकडे जाताना चौंडी येथे पुण्यश्‍लोक अहल्यादेवी होळकरांचे दर्शन घेतले. त्यानंतर रोहित यांनी आपल्या मातोश्री सुनंदा यांच्यासह थेट पालकमंत्री शिंदे यांचे निवासस्थान गाठले. घरी आलेल्या प्रतिस्पर्धी उमेदवाराचे पालकमंत्री शिंदे यांनीही उत्साहात स्वागत केले. ‘‘की विकासासाठी कटिबद्ध आहे. विकासाबाबत सर्व कार्यकर्त्यांनीही भांडण न करता एकत्र राहावे’’, अशी अपेक्षाही आहे. मंत्री शिंदे यांनी विजयी उमेदवार रोहित यांचा फेटा बांधून सत्कार केला. या मतदारसंघात विजयी उमेदवार पराभूत उमेदवाराच्या घरी जाऊन भेट घेण्याचा हा पहिला प्रसंग अनेकांनी अनुभवला. 

रोहित पवारांनी दाखविलेला सुसंस्कृतपणाचा राज्यात चर्चेचा विषय ठरला. निवडणुकीनंतर कार्यकर्त्यांमध्ये तणाव निर्माण होण्याचे अनेक प्रसंग घडतात. येथे मात्र झाला स्नेहाचा सोहळा झाला. कर्जत-जामखेडमधील अनोखा सोहळा संपूर्ण राज्यभर सोशल मीडियाच्या माध्यमातून चर्चिला जात आहे.