लेखी आश्वासनानंतर बाजार समिती कर्मचाऱ्यांचे धरणे आंदोलन मागे

नाशिक : शासनाने जाहीर केलेला महाभाई भत्ता मिळावा व तसेच सातवा वेतन आयोग त्वरित लागू करावा यासह विविध मागण्यांसाठी नाशिक उत्पन्न बाजार समितीच्या कर्मचाऱ्यांनी गुरुवार (ता. १३) बाजार समितीच्या कर्मचाऱ्यांनी बेमुदत धरणे आंदोलन शहरातील ईदगाह मैदान येथे सुरू होते. अखेर बाजार समितीचे सचिव यांनी लेखी देऊ न येणाऱ्या संचालक मंडळाच्या सभेत निर्णय घेण्यात येईल, आंदोलन स्थगित करून बाजार समितीस सहकार्य करावे, या आशयाचे लेखी पत्र दिल्याने सोमवार (ता. १७) आंदोलन मागे घेण्यात आले.  बाजार समितीचे अधिकारी व कर्मचाऱ्यांनी गुरुवार (ता. ६) मागण्याचे पत्र दिले होते. मात्र काहीच प्रतिसाद न मिळाल्याने आठ दिवसांनंतर गुरुवार (ता. १३) धरणे आंदोलनाला सुरुवात केली होती. मात्र कर्मचाऱ्यांच्या मागण्यासंदर्भात विद्यमान सभापतींविरोधात अविश्वास ठराव दाखल करण्याची कार्यवाही सुरू असल्याने निर्णय घेणे शक्य नसल्याचे बाजार समितीच्या सचिवांनी दिलेल्या पत्रात म्हटले आहे. हे पत्र आंदोलनस्थळी सचिवांकडून मिळाल्यानंतर कर्मचाऱ्यांनी आंदोलन मागे घेतले. या वेळी महाराष्ट्र राज्य बाजार समिती कर्मचारी संघटनेचे विभागीय अध्यक्ष नीलेश दिंडे, मोहन पाटील आदी प्रमुख कार्यकर्ते उपस्थित होते.