परभणी येथे संघर्ष पदयात्रेचा समारोप

परभणी  ः शेतकरी संघटनेचे संस्थापक शरद जोशी यांच्या जयंतीनिमित्त शेतकरी संघटनेतर्फे सोमवारी (ता. ३) वडगाव स्टेशन (ता. सोनपेठ) येथून काढण्यात आलेली संघर्ष पदयात्रा शुक्रवारी (ता. ७) जिल्हाधिकारी कार्यालयावर दाखल झाली. या वेळी या यात्रेचा समारोप झाला. जिल्हा प्रशासनाने आधारभूत किमतीने खरेदी करावी या मागणीसाठी मुगाची पोती भरलेला ट्रॅक्टर जिल्हाधिकारी कार्यालयात आणून उभा करण्यात आला होता.

शेतकऱ्यांना विमा परतावा देण्याचे आश्वासन पूर्ण करावे, बंद साखर कारखाने सुरू करावेत, थकित ऊस देयके अदा करावीत, सर्व शेतकऱ्यांना कर्जमुक्त करावे, नवीन कर्ज वितरीत करावे आदींसह स्थानिक प्रश्नी काढण्यात आलेल्या या संघर्ष यात्रेच्या माध्यमातून सोनपेठ, पाथरी, मानवत, परभणी या तालुक्यांतील ८३ गावांमधील शेतकऱ्यांचे प्रश्न जाणून घेत जनजागृती करण्यात आली.

शुक्रवारी (ता. ७) ही संघर्ष पदयात्रा जिल्हाधिकारी कार्यालयावर येऊन धडकली. या वेळी शेतकरी संघटनेचे कार्याध्यक्ष कालिदास आपेट, जिल्हाध्यक्ष माऊली कदम, अखिल भारतीय किसान सभेचे विलास बाबर, बंडू सोळंके, अनंत कदम आदी उपस्थित होते.

सातत्याने मागणी करूनही हमीभाव खरेदी केंद्र सुरू न करण्यात आल्यामुळे शेतकऱ्यांची लूट होत आहे. शासन तसेच प्रशासनाकडून शेतकऱ्यांच्या प्रश्नांकडे सातत्याने जाणीवपूर्वक दुर्लक्ष केले जात असल्याने या वेळी नाराजी व्यक्त करण्यात आली. शेतकऱ्यांच्या प्रश्नांवर जिल्हाधिकारी पी. शिवशंकर आणि शेतकरी संघटनेचे प्रतिनिधी यांच्यामध्ये चर्चा झाली. मूग घेऊन आलेल्या ट्रॅक्टर तसेच बाजार समितीमध्ये आलेल्या शेतीमालाचे वजन इलेक्ट्राॅनिक वजन काट्यावर करावे. हमीभावाने खरेदी करावी, असे निर्देश जिल्हाधिकाऱ्यांनी दिले.