अकोट तालुक्यातील केळी उत्पादकांचा पीकविम्यासाठी ठिय्या

अकोला  ः जिल्ह्यातील अकोट तालुक्यातील केळी उत्पादकांनी केळीच्या नुकसानीचा विमा तातडीने मिळावा, या मागणीसाठी शुक्रवारी (ता. १५) न्यू इंडिया इन्शुरन्स कंपनीच्या येथील कार्यालयात धडक देत ठिय्या आंदोलन सुरू केले. मागण्यांबाबत ठोस कार्यवाही होत नाही तोपर्यंत माघार घेणार नसल्याचे शेतकऱ्यांनी जाहीर केल्याने अधिकाऱ्यांची एकच धांदल उडाली.

जिल्ह्यातील केळी उत्पादकांनी २०१८-१९ या हंगामात केळी पिकाचा विमा काढला आहे. या विम्याचा क्लेम कालावधी संपून बरेच दिवस झाले. या हंगामात शेतकऱ्यांचे गारपीट, वादळी वारा तसेच उष्णतेमुळे मोठे नुकसान झाले आहे. मात्र, ज्या कंपनीकडे विमा उतरविण्यात आला त्यांच्याकडून अद्याप भरपाई मिळालेली नाही. विम्याचा लाभ न मिळाल्याने शुक्रवारी अकोट तालुक्यातील पणज, बोचरा व इतर गावांमधील प्रदीप ठाकूर (सरपंच), मनोज बोचे, कैलास बारब्दे, विकास देशमुख, पंढरी राऊत, केशव जायले, ज्ञानेश्‍वर जायले, प्रमोद शेळके, मधुकर जायले, प्रदीप जायले, अंकुश जायले, अनिल रोकडे, संतोष जायले, गजानन सावरकार, प्रवीण शेंडे, मंगल मालवे, विजय बरदे, पिंटू जायले, रवी जायले, संतोष पंडित, राजेंद्र गवई आदी शेतकरी कंपनीच्या कार्यालयात दाखल झाले. त्यांनी दुपारपासून कार्यालयात ठिय्या आंदोलन सुरू केले. जोपर्यंत ठोस आश्वासन कंपनीकडून मिळत नाही तोवर आंदोलन मागे घेणार नसल्याचे शेतकरी विकास देशमुख यांनी सांगितले. सायंकाळी उशिरापर्यंत आंदोलन सुरूच होते.