खरेदी केंद्र सुरू करण्याच्या मागणीसाठी साताऱ्यात बळिराजा संघटनेचे उपोेषण

सातारा  : शेतीमाल खरेदी केंद्रे त्वरित सुरू करावीत, शेतीमाल तारण योजना सुरू करावी, एकही व्यापारी सोयाबीन हमीभावाने खरेदी करत नसून काटामारी, हमाली, घट या नावाखाली लूट करणाऱ्यांवर कडक कारवाई करावी यासह विविध मागण्यांसाठी बळिराजा शेतकरी संघटनेचे अध्यक्ष पंजाबराव पाटील यांच्या नेतृत्वाखाली जिल्हाधिकारी श्वेता सिंघल यांना सोमवारी (ता.२४) निवेदन देत संघटनेने उपोषण सुरू केले आहे.

जिल्ह्यात सोयाबानीसह अन्य कडधान्यांची काढणी सुरू झाली आहे. मळणी करून शेतीमाल बाजारात नेण्यासाठी शेतकऱ्यांची तयारी सुरू आहे. बाजारात मात्र केंद्र सरकारने जाहीर केलेल्या हमीभावाने शेतीमाल खरेदी केला जात नाही. यामुळे शेतकऱ्यांना शेतीमालाची विक्री करता येत नाही. यासाठी बळिराजा शेतकरी संघटनेने बुधवारी (ता.१२) शेतीमाल खरेदी केंद्र त्वरित सुरू करावे, यासह विविध मागण्यांचे निवेदन जिल्हाधिकाऱ्यांना दिले होते. मात्र यावर आजपर्यंत कोणतीच कार्यवाही झाली नसल्याने सोमवारपासून सातारा जिल्हाधिकारी कार्यालयासमोर बळिराजा शेतकरी संघटनेने उपोषण सुरू केले आहे.

या वेळी पंजाबराव पाटील म्हणाले, की आमच्या मागण्यांसाठी आम्ही जिल्हाधकारी श्वेता सिंघल यांची भेट घेतली आहे. खरेदी केंद्र नसल्यामुळे शेतकऱ्यांना सोयाबीनची विक्री करता येत नाही. याचा फायदा घेऊन व्यापारी शेतकऱ्यांची वेगवेगळ्या मार्गाने लूट करत आहेत. यामुळे त्वरित खरेदी केंद्र तसेच शेतमाल तारण योजना सुरू करावी व लूट करणाऱ्या व्यापाऱ्यांवर कारवाई करण्याची मागणी केली आहे. दोन दिवसांत कारवाई केली जाईल, असे अाश्वासन जिल्हाधिकाऱ्यांनी दिले आहे. मात्र याकडे दुर्लक्ष केल्यास आंदोलनाची तीव्रता वाढवली जाईल, असा इशारा दिला आहे.