मराठवाड्यात विविध ठिकाणी चक्‍का जाम आंदोलन

औरंगाबाद : दूध दराच्या प्रश्नावरून ‘स्वाभिमानी’ने पुकारलेल्या चक्‍का जाम आंदोलनाच्या आवाहनाला गुरुवारी (ता. १९) औरंगाबाद, जालना, बीड, उस्मानाबाद जिल्ह्यांत विविध ठिकाणी प्रतिसाद मिळाला. रास्ता रोको करत आपल्या मागण्यांचे निवेदन आंदोलनकर्त्यांनी संबंधितांना दिले. शिवाय मागण्या मान्य न झाल्यास आंदोलन तीव्र करण्याचा इशाराही दिला आहे.

औरंगाबाद जिल्हा औरंगाबाद जिल्ह्यातील गंगापूर तालुक्‍यांतर्गत येत असलेल्या ढोरेगाव येथे औरंगाबाद-पुणे महामार्ग रोखत प्रहार शेतकरी संघटना व स्वाभिमानी शेतकरी संघटना यांनी संयुक्त चक्का जाम आंदोलन केले. सरकारने शतकऱ्यांच्या मागण्या मान्य न केल्यास आंदोलन आणखी तीव्र करण्यात येईल, असे प्रहार शेतकरी संघटनेचे भाऊसाहेब शेळके यांनी सांगितले. या वेळी पोलिस निरीक्षक सुनील बिर्ला यांच्यासह पोलिसांचा मोठा बंदोबस्त होता. या वेळी स्वाभिमानीचे जिल्हा अध्यक्ष चंद्रशेखर साळुंके, गुलाम अली, गंगापूर तालुका अध्यक्ष संपत रोडगे, प्रहार शेतकरी संघटनेचे उपजिल्हा प्रमुख भाऊसाहेब शेळके, किसान सेनेचे जिल्हाप्रमुख, अरुण रोडगे, प्रहारचे युवा तालुका प्रमुख सुधीर बारे, सतीश चव्हाण, राजू वैद्यसह शेकडो शेतकरी उपस्थित होते. पैठण-औरंगाबाद मार्गावरही पैठण येथे रास्ता रोको आंदोलन करण्यात आले. यामध्ये माउली पाटील मुळे, तालुकाध्यक्ष साबळे, अरुण काळे, आरेफ पठाण, गणेश शेळके, राजू बोंबले यांच्यासह कार्यकर्ते सहभागी झाले होते.

जालना जिल्हा दूध दरासाठीच्या आंदोलनच्या चौथ्या दिवशी स्वाभिमानी शेतकरी संघटनेच्या कार्यकर्त्यांनी गुरुवारी (ता. १९) दुपारी वडीगोद्री येथे औरंगाबाद-सोलापूर या राष्ट्रीय महामार्गावर रास्ता रोको आंदोलन केले. त्यामुळे महामार्गाच्या दुतर्फा वाहनांच्या रांगा लागल्या होत्या. तसेच राजुर शहरातील चौफुलीवर कार्यकार्त्यांनी ठिय्या मंडला.

उस्मानाबाद जिल्हा उस्मानाबाद जिल्ह्यातील नारंगवाडी पाटी, भोंजा व अणदूर येथे आंदोलन झाले. उमरगा तालुक्‍यातील नारंगवाडी पाटी येथे रस्त्यावर दूध ओतून जवळपास तासभर लातूर-उमरगा मार्ग रोखून धरण्यात आला. परंडा तालुक्‍यातील भोंजा येथे शेतकऱ्यांनी रस्त्यावर दधू ओतून निषेध व्यक्‍त केला. नळदुर्ग येथेही आंदोलन करण्यात आले. -----------------------------