`वीज दरवाढ कमी न केल्यास पुणे-बंगळूर महामार्ग रोखू`

वीजदर प्रश्नी आंदोलन करण्यात आले
वीजदर प्रश्नी आंदोलन करण्यात आले

कोल्हापूर   : कृषिपंपांच्या रखडलेल्या जोडण्या त्वरित द्याव्यात, यांसह कृषी, औद्योगिक, घरगुती, वाणिज्य ग्राहकांच्या वीजदरात मोठ्या प्रमाणात वाढ केली आहे, ही दरवाढ कमी करावी, या मागणीसाठी स्वाभिमानी शेतकरी संघटना, इरिगेशन फेडरेडशनसह अन्य संघटनांनी सोमवारी (ता.१) येथील महावितरण कार्यालयावर मोर्चा काढला. मागण्या मान्य न झाल्यास ९ ऑगस्टला पुणे-बंगळूर महामार्ग रोखण्याचा इशारा या वेळी देण्यात आला. 

माजी खासदार राजू शेट्टी, ज्येष्ठ नेते प्रा. एन. डी. पाटील, आमदार सतेज पाटील, वीजतज्ज्ञ प्रताप होगाडे आदींनी या मोर्चाचे नेतृत्व केले. दसरा चौकातून दुपारी दीड वाजता या मोर्चाला सुरवात झाली. महावितरणच्या निषेधार्थ घोषणा देत मोर्चा महावितरण कार्यालयाच्या प्रवेशद्वाराजवळ आल्यानंतर त्याचे रूपांतर सभेत झाले. या मोर्चात हजारो शेतकरी सहभागी झाले.

या वेळी प्रा. एन. डी. पाटील म्हणाले, की मागण्या मान्य होत नसल्याने आता तीव्र आंदोलन उभारण्यात येणार आहे. प्रसंगी मंत्रालयाला घेराओ घालू. आता निर्धार करण्याची वेळ आली आहे. कोणत्याही परिस्थितीत आंदोलनाची धार येथून पुढे वाढविण्यात येईल. शासनाने कोणतीही आश्‍वासने पाळली नाहीत, हे संतापजनक आहे.

श्री. शेट्टी म्हणाले, की महावितरणने न वापरलेल्या विजेचे बिल शेतकऱ्यांवर लादले आहे. शेतकऱ्याने वीज वापरली, असे सांगून महावितरण आपला भ्रष्टाचार लपवू पाहत आहे. महावितरणने कृषी-औद्योगिक घरगुती वाणिज्य ग्राहकांच्या वीजदरात मोठ्या प्रमाणात वाढ केली आहे. ही दरवाढ कमी करण्याचे आश्वासन भाजप सरकार सत्तेवर येण्यापूर्वी दिले होते. पण, सत्तेवर आल्यापासून राज्यातील कृषिपंपधारक, घरगुती, औद्योगिक ग्राहकांची बेसुमार आर्थिक लूट सुरू आहे. वीजनिर्मिती खर्च, प्रशासकीय खर्च आणि वीजगळती यावर कोणतेही नियंत्रण नाही. मुख्यमंत्री व ऊर्जामंत्री यांनी दिलेल्या आश्वासनांची अजूनही पूर्तता झालेली नाही. राज्यातील सर्व शेतीपंपधारक वीजग्राहकांची वीजबिले तपासून दुरुस्त व अचूक करण्यात यावी. यासाठी आता लढा तीव्र करण्यात येईल.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com