पीककर्जाच्या मागणीसाठी शेतकऱ्यांचे औरंगाबादला आंदोलन

औरंगाबाद  : खरीप हंगामासाठी पीककर्ज मिळावे, या मागणीवरून शेतकरी आक्रमक झाले. औरंगाबाद जिल्हा मध्यवर्ती सहकारी बॅंकेसमोर बुधवारी (ता.१२) शेकडो शेतकऱ्यांनी त्वरित पीककर्ज वाटप करावे, या मागणीसाठी घेराव आंदोलन केले. या आंदोलनाच्या माध्यमातून शेतकऱ्यांनी आपल्या मागण्या मांडल्या. याप्रकरणी लवकरच बॅंक संचालक मंडळाची बैठक बोलविण्याचे लेखी आश्‍वासन बॅंकेचे अध्यक्ष सुरेश पाटील यांनी दिल्यानंतर आंदोलन मागे घेण्यात आले.

केवळ औरंगाबादेमध्येच नाही; तर संपूर्ण मराठवाड्यात शेतकऱ्यांना खरीप पीककर्ज मिळण्याचा प्रश्‍न ऐरणीवर आला आहे. औरंगाबाद जिल्ह्यातील शेतकऱ्यांना खरीप पीककर्ज मिळावे, यासाठी संतोष पाटील जाधव (वजनापूरकर) यांच्या नेतृत्वात ६ सप्टेंबरला जिल्हाधिकाऱ्यांसह जिल्हा बॅंक प्रशासनाला निवेदन देण्यात आले होते. त्यावर निर्णय न झाल्याने संतोष जाधव यांच्या नेतृत्वात शेकडो शेतकऱ्यांनी बुधवारी जिल्हा सहकारी बॅंकेच्या मुख्य कार्यालयावर धडक देऊन घेराव आंदोलन सुरू केले.

या वेळी बॅंकेचे अध्यक्ष सुरेश पाटील यांनी आंदोलनकर्त्या शेतकऱ्यांशी संवाद साधला. मागण्यासंदर्भात लेखी आश्‍वासन दिले जात नाही तोपर्यंत मागे न हटण्याची भूमिका शेतकऱ्यांनी घेतल्यानंतर चर्चेअंती श्री. पाटील यांनी शेतकऱ्यांना त्यांच्या मागण्यांसदर्भात लवकरच संचालक मंडळाची बैठक घेण्याचे लेखी आश्‍वासन दिले.

या बैठकीत अटी शिथिल करण्याकरिता किंवा मार्ग काढण्याकरिता प्रयत्न करण्याचे, शिवाय केलेल्या दुरुस्तीप्रमाणे ३० सप्टेंबरपर्यंत खरीप हंगामाचे कर्जवाटप केले जाईल, अशीही खात्री श्री. पाटील यांनी दिली. त्यानंतर आंदोलन मागे घेण्यात आले.

या आहेत प्रमुख मागण्या