वसारी येथे ‘स्वाभिमानी’ने केली दगड पेरणी

वाशीम : खरीप हंगाम दारात आलेला असतानाही जिल्ह्यातील शेतकऱ्यांना अद्याप पीककर्ज मिळालेले नाही. दुष्काळी मदत मिळाली नसून, सन्मान योजनेचीही अनेकांना मदत झालेली नाही. अशा स्थितीत शेतकऱ्यांजवळ पैसे नसल्याने शासनाचे याकडे लक्ष वेधण्यासाठी स्वाभिमानी शेतकरी संघटनेने बुधवारी (ता. २६) निषेधात्मक दगड पेरणी केली. जिल्हाध्यक्ष दामोदर इंगोले यांच्या नेतृत्वात शेतकऱ्यांनी वसारी येथे हे आंदोलन केले.

वाशीम जिल्ह्यात दोन दिवसांपूर्वी पाऊस झालेला असून, काही ठिकाणी पेरणीयोग्य स्थिती आहे. मात्र शेतकऱ्यांनी पैशांअभावी अद्यापही बियाणे, खतांची खरेदी केलेली नाही. बँकांकडून पीककर्ज वाटपात वेळखाऊपणा केला जात आहे. शेतकऱ्यांना पैशांची गरज आहे . मात्र ना शासन मदत करीत आहे ना बँकांचे पाठबळ मिळत आहे. अशा स्थितीत हतबल असलेल्या शेतकऱ्यांना पेरणीची चिंता लागलेली आहे. जिल्हयात दुष्काळी स्थिती होती. शेतीमालाही पुरेसा भाव मिळाला नाही. आता शेतकऱ्यांना पीककर्ज मिळत नसल्याने व पेरणीसाठी त्याच्याजवळ बियाणे, खते नसल्यामुळे स्वाभिमानी शेतकरी संघटनेने वसारी येथे अरुण लादे यांच्या शेतात दगड पेरणीचे हे निषेधात्मक आंदोलन केले.