दूध दरप्रश्नी किसान सभेचे राज्यभरात रास्ता रोको

किसान सभेचे आंदोलन
किसान सभेचे आंदोलन

पुणे : १ जूनचा संप, शेतकरी लाॅंग मार्चदरम्यान मान्य मागण्यांची अंमलबजावणी, शेतकरी कर्जमुक्ती व दूध तसेच शेतमालाला रास्त दर मिळावा, या मागणीसाठी किसान सभा व शेतकरी संघर्ष समितीच्या वतीने रविवारी (ता. १०) राज्यातील २१ जिल्ह्यांत रास्ता रोको आंदोलन करण्यात आले. आंदोलनात शेतकरी मोठ्या संख्येने सामील झाले होते, अशी माहिती शेतकरी संघर्ष समितीच्या वतीने देण्यात आली.

शेतकरी संपाला एक जून रोजी एक वर्ष पूर्ण झाल्याच्या पार्श्वभूमीवर अपूर्ण मागण्यांच्या पूर्ततेसाठी किसान सभा व शेतकरी संघर्ष समितीच्या वतीने राज्यभर आंदोलन सुरू करण्यात आले होते. या आंदोलनात अखिल भारतीय किसान सभा, प्रहार, भूमिपुत्र शेतकरी संघटना, शरद जोशी विचार मंच, लाखगंगा आंदोलन, भ्रष्टाचारविरोधी जन आंदोलन, शेतकरी कृती समिती, पीपल्स हेल्पलाइन व भारतीय कृषक समाजासह विविध संघटना सामील झाल्या होत्या.

आंदोलनाचा परिणाम म्हणून सरकारने दूध दरप्रश्नी शासनादेश काढला आहे. मात्र, काढण्यात आलेल्या शासनादेशात अनेक संदिग्धता आहेत. सहकारी दूध संघांनी या आदेशाचे पालन करण्यास नकार दिला आहे. खासगी दूध कंपन्यांना हा आदेश लागू नाही. लॉंग मार्चच्या मान्य मागण्यांचीही सरकारने अद्याप अंमलबजावणी केलेली नाही, या पार्श्वभूमीवर हे आंदोलन करण्यात आले.  

एक जून ते दहा जून या कालावधीत झालेल्या आंदोलनाच्या पार्श्वभूमीवर संघर्ष समितीची लवकरच बैठक घेण्यात येणार असून, यात आंदोलनाची पुढील दिशा ठरविण्यात येणार आहे. सर्व मागण्यांची पूर्तता झाल्याशिवाय आंदोलन थांबणार नसल्याचे संघर्ष समितीने जाहीर केले आहे.

रविवारच्या आंदाेलनात डॉ. अशोक ढवळे,  आमदार बच्चू कडू,  आमदार जे. पी. गावित,  किसन गुजर,   डॉ. अजित नवले,   संतोष वाडेकर, अनिल देठे, विठ्ठल पवार, धनंजय धोर्डे, अशोक सब्बन,   कारभारी गवळी, राजाराम देशमुख हे सहभागी झाले होते.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com