सेलू, पाथरी तालुक्यांत कर्जमुक्तीसाठी धरणे आंदोलन सुरू

परभणी : शेतकऱ्यांचे ३० जून २०१९ पर्यंतचे संपूर्ण शेतीकर्ज माफ करून संपूर्ण कर्जमुक्ती द्यावी, यासह अन्य मागण्यांसाठी सेलू, पाथरी तालुक्यातील अनेक गावांतील शेतकऱ्यांनी बुधवारपासून (ता. २) गावांमध्ये मी शेतकरी आंदोलनांतर्गत बेमुदत धरणे आंदोलन सुरू केले आहे.

राज्य सरकारने जाहीर केलेली कर्जमाफी फसवी आहे. जाचक अटी, निकषांमुळे लाखो शेतकरी कर्जमाफीपासून अजूनही वंचित राहिले आहेत. त्यामुळे शेतकऱ्यांमध्ये सरकारविरुद्ध तीव्र असंतोष निर्माण झाला आहे. फसव्या कर्जमाफीच्या निषेधार्थ तसेच ३० जून २०१९ पर्यंत सर्व शेती कर्ज विनाअट माफ करून शेतकऱ्यांना कर्जमुक्ती द्यावी, शेतीमालाला दीडपट हमीभावाचा कायदा करावा या प्रमुख मागण्यांसाठी सेलू तालुक्यातील डिग्रस जहांगीर, करडगाव, साळेगाव, देऊळगाव, झोडगाव, खवणे पिंपरी, सावंगी ताठे आदी २५ गावांमध्ये हे आंदोलन सुरू करण्यात आले.

पाथरी तालुक्यातील निवळी, वडी, खेडुळा, हादगाव नखाते, गोपेगाव आदी १५ गावांतील शेतकऱ्यांनी धरणे आंदोलन सुरू केले आहे. जिंतूर, मानवत तसेच अन्य तालुक्यांतील शेतकरीसुद्धा पुढील एक-दोन दिवसांत आंदोलन सुरू करणार आहेत. परभणी जिल्ह्यातील किमान १०० गावांतील शेतकरी कर्जमुक्तीच्या लढ्यात सहभागी होणार आहेत. ‘मी शेतकरी’ या नावाने हे आंदोलन केले जात आहे, असे आंदोलनाचे समन्वयक रामेश्‍वर पौळ यांनी सांगितले.