जायकवाडीच्या पाण्यासाठी पाटबंधारे कार्यालयात शेतकऱ्यांचा ठिय्या

पैठण, जि. औरंगाबाद : जायकवाडी प्रकल्पातून आपेगाव व हिरडपुरी बंधाऱ्यात पाणी सोडण्याच्या मागणीसाठी दोन दिवसांपासून आंदोलन सुरू आहे. बुधवारी (ता. १५) तिसऱ्या दिवशी शेतकऱ्यांच्या या आंदोलनाची धार तीव्र झाली. बुधवारी दुपारी १ वाजेनंतर शेतकऱ्यांनी जायकवाडी प्रकल्पानजीक असलेल्या पाटबंधारे विभागाच्या कार्यालयात ठाण मांडले. जोवर न्यायोचित भूमिका घेतली जात नाही तोवर कार्यालयातून न हटण्याचा निर्णय शेतकऱ्यांनी घेतला आहे.  

हाताला काम, जनावरांना चारा, आपेगाव व हिरडपुरी बंधाऱ्यात जायकवाडीतून पाणी सोडण्यासाठी गोदावरीच्या पात्रात पाणी सोडण्याच्या मागणीसाठी जलसमाधी आंदोलन करण्याचा इशारा अन्नदाता शेतकरी संघटनेच्या नेतृत्वात शेतकऱ्यांनी दिला होता. परंतु पोलिसांनी त्यांना प्रकल्पाच्या दिशेने जाऊ न दिल्याने शेतकरी सोमवारी (ता. १३) प्रकल्पाच्या भिंतीखालील गोदावरी पात्राच्या काठावर ठाण मांडून बसले. त्या दिवशी रात्रीही शेतकऱ्यांनी नदीपात्रात मुक्काम केला. या वेळी ठोस आश्वासन न देणाऱ्या शासन व प्रशासनाचा शेतकऱ्यांनी निषेध केला.

दरम्यान, मंगळवारी (ता. १४) सायंकाळपर्यंत मागण्यांविषयी ठोस भूमिका घेण्याचे प्रशासनाच्या सूत्रांनी कळविले. मात्र मंगळवारीही याविषयी ठोस निर्णय न झाल्याने आंदोलन सुरूच होते. बुधवारी तिसऱ्या दिवशी मात्र आंदोलक शेतकऱ्यांनी जायकवाडी प्रकल्पाजवळील पाटबंधारे विभाग नाथनगर(उत्तर)च्या कार्यकारी अभियंता यांच्या कार्यालयात ठाण मांडले. आतून दरवाजा लावून जवळपास दोनशे शेतकऱ्यांनी स्वत:ला कार्यालयात कोंडून घेतल्याची माहिती ‘अन्नदाता’चे अध्यक्ष जयाजीराव सूर्यवंशी यांनी दिली. जोवर निर्णय होत नाही तोवर कार्यालयात बसून राहण्याचा निर्णय आंदोलक शेतकऱ्यांनी घेतला आहे. दुपारी साडेतीन वाजेपर्यंत याप्रकरणी निर्णय झालेला नव्हता.