शेतकरी कंपन्या स्थापन करण्यासाठी करार

पुणे ः नाबार्डच्या कंपनी विकास फंडातून शेतकरी उत्पादक कंपन्या स्थापन करण्यासाठी महाराष्ट्र सहकार विकास महामंडळ नोडल एजन्सी म्हणून काम करणार आहे. याबाबतचा करार नाबार्ड आणि महामंडळामध्ये नुकताच झाला आहे. या कराराअंतर्गत महामंडळ पीकनिहाय क्लस्टरची निवड करून, शेतकरी उत्पादन कंपन्या स्थापनेसाठी शेतकऱ्यांना प्रोत्साहन देणार असल्याचे महामंडळाचे कार्यकारी संचालक मिलिंद आकरे यांनी सांगितले.  आकरे म्हणाले, ‘‘महामंडळाच्या वतीने पंतप्रधान नरेंद्र मोदी यांच्या शेतकऱ्यांचे उत्पन्न दुप्पट करण्याचा महत्त्वाकांक्षी योजनेत, ग्रामीण भागातील कृषी आधारित रोजगार उपलब्ध करून देण्यासाठी प्रयत्न सुरू आहेत. यासाठी गावपातळीवर पीकनिहाय क्लस्टर निवड करून शेतकरी उत्पादन कंपन्या स्थापनेसाठी शेतकऱ्यांना प्रोत्साहन देण्यात येणार आहे. नाबार्डकडेदेखील उत्पादक कंपनी विकास फंड स्थापन केला असून, या फंडातून शेतकरी उत्पादक कंपन्या स्थापनेसाठी महामंडळ नाबार्ड सोबत काम करणार आहे. याबाबतचा करार करून, नाबार्डने महामंडळाला पत्र दिले आहे. शेतकरी उत्पादक कंपनी स्थापनेबरोबरच प्रशिक्षण, अभ्यास दौरे, व्यवसाय आराखडा, बाजार जोडणी, शासकीय योजनांचा आणि वित्तीय संस्थांबरोबर समन्वय आदी  मुद्द्यांवर महामंडळ काम करणार आहे.’’ तर या प्रकल्पाच्या प्रभावी अंमलबजावणीसाठी महामंडळाचे महाव्यवस्थापक प्रतीक पोखरकर आणि राज्य व्यवस्थापक ॲड. विजय गोफणे तज्ज्ञ म्हणून काम करणार आहेत. कराराच्या वेळी नाबार्डचे मुख्य सरव्यवस्थापक उदय शिरसाळकर, डॉ. उषामणी पी, श्री कृष्णन व्ही तर महामंडळाचे कार्यकारी संचालक मिलिंद आकरे, प्रतीक पोखरकर, विजय गोफणे, जालिंदर बडदे आदी उपस्थित होते.