तुम्हीच अभ्यास करा, अन् विम्याचे ठरवा : कृषी विभाग

सोलापूर ः पुनर्रचित हवामान आधारित फळपीक विम्यासाठी गतवर्षी कंपन्यांनी केलेले करार रद्द करण्याची नामुष्की कृषी विभागावर ओढावल्याचा प्रकार नुकताच घडला. त्यानंतर नव्याने पुनर्रचित हवामान आधारित फळपीक विम्यासाठी नवा आदेश कृषी विभागाने काढला. पण त्याचबरोबर एक पत्रक काढत शेतकऱ्यांनीच हवामानाच्या धोक्याचा अभ्यास करावा आणि विमा भरायचा की नाही तो ठरवावा, असे म्हटले आहे. 

गेल्या काही वर्षांपासून पीकविमा हा विषय चर्चेचा झाला आहे. विविध शेतकरी संघटना आणि संस्थांसह व्यक्तिगत पातळीवरही विमा योजनेच्या आदेशातील त्रुटींवर सातत्याने बोट ठेवले जात असल्याने कृषी विभाग विम्याच्या बाबतीत सावधतेने पावले उचलत आहे. या सावधेतूनच हे पत्रक कृषी विभागाला काढावे लागल्याचे समजते. पूर्वी विम्याची सक्ती होती. पण आता ही सक्ती नसून, ही योजना ऐच्छिक ठेवली आहे. विशेषतः कर्जदारांना सुद्धा शेतकऱ्यांच्या लेखी संमतीशिवाय बँका विमा हप्ता कपात करू शकत नाहीत. याबाबतही दक्षता घ्या, अशी सूचनाही या पत्रात करण्यात आली आहे. 

या सर्व पार्श्‍वभूमीवर गोंधळ-गडबड होऊ नये, यासाठी सर्वस्वी जबाबदारी शेतकऱ्यांवर टाकताना कृषी विभागाने या विमा योजनेतील अंतर्भूत धोके, भरावी लागणारी विमा हप्त्याची रक्कम आणि या योजनेच्या अटी, शर्ती याबाबतचा अभ्यास करूनच या योजनेत सहभाग घ्यावा, असाही स्पष्ट उल्लेख या पत्रात करण्यात आला आहे.