कृषी निविष्ठा विक्रेत्यांचा बंद मागे; कृषिमंत्र्यांचे आश्वासन

औरंगाबाद :  कृषी निविष्ठा विक्रेत्यांचा मागण्यांसंदर्भात पुकारलेला बंद अखेर मागे घेण्यात आला आहे. कृषी मंत्री दादा भुसे, कृषी आयुक्त सुहास दिवसे, कृषी संचालक घावटे यांच्याशी भ्रमणध्वनीवरून बंदच्या तिसऱ्या दिवशी अखेरच्या क्षणी माफदाच्या पदाधिकाऱ्यांचा  संवाद झाला. त्यामध्ये कृषी मंत्र्यांसह अधिकाऱ्यांनी माफदाच्या मागण्यांसंदर्भात कोरणा संकट निवारल्यानंतर बैठक घेऊन ज्या जास्तीत जास्त ज्या मागण्या मान्य करणे शक्य आहे त्या मान्य  करू असे आश्वासन  दिल्याने शेतकरी हित लक्षात घेऊन  हा बंद मागे घेण्यात आल्याची माहिती माफदाचे अध्यक्ष जगन्नाथ काळे यांनी दिली दरम्यान, मागण्यांबाबत प्रशासन स्तरावरून कार्यवाही होत नसल्याने कृषी निविष्ठा विक्रेत्यांचा तीन दिवसीय बंद पाळण्यात आला. रविवारी (ता. ११) तिसऱ्या दिवशीही बंद कायम होता. राज्यभरातून या बंदला प्रतिसाद मिळाल्याचा दावा महाराष्ट्र फर्टिलायझर्स पेस्टिसाइड सीड्स डीलर्स असोसिएशननकडून (माफदा) करण्यात आला. 

कृषी निविष्ठा विक्रेत्यांच्या विविध मागण्या कृषी विभागाकडे गेल्या अनेक वर्षांपासून प्रलंबित आहेत. परंतु त्यावर कोणतीही पावले उचलली जात नसल्याने बंद पुकारण्यात आल्याचे ‘माफदा’कडून सांगण्यात आले.  सुरुवातीला तीन दिवसांच्या बंदमध्ये शासन, प्रशासन स्तरावरून हालचाल न झाल्यास पुढे बेमुदत बंद करण्याचा इशारा ‘माफदा’ने दिला होता. दुसरीकडे शासन किंवा प्रशासनाकडून मात्र मागण्याविषयी वा बंद मागे घेण्याविषयी कोणताही संवाद गत तीन दिवसात केला नसल्याचे ‘माफदा’चे अध्यक्ष जगन्नाथ काळे यांनी सांगितले. 

मागण्यांचे महत्त्व त्यासंदर्भात शासन, प्रशासनाची भूमिका व यापुढे मागण्यांच्या रेट्याविषयी घ्यावयाचा निर्णय या अनुषंगाने ‘माफदा’ने रविवारी(ता १२) सायंकाळी ऑनलाइन बैठकीचे आयोजन केले होते. या बैठकीत विविध जिल्ह्याचे पदाधिकारी, विभागाचे पदाधिकारी, राज्यस्तरावरील पदाधिकारी सहभागी होणार होते. मात्र कृषिमंत्री, कृषी आयुक्त यांनी आश्वासन दिल्यानंतर तीन दिवसीय बंद नंतर पुकारण्या आलेल्या बेमुदत बंद मागे घेण्यात आला.