ॲग्रोवन कृषी प्रदर्शनाचा उत्साहात समारोप

सांगली : गेल्या तीन दिवसांपासून सुरू असलेल्या नेचर केअर फर्टिलायझर्स प्रस्तुत ‘ॲग्रोवन’ कृषी प्रदर्शनाचा रविवारी (ता. ७) उत्साहात समारोप झाला. मे. बी. जी. चितळे आणि चितळे जिनस एबीएस इंडिया प्रदर्शनाचे सहप्रायोजक होते. प्रदर्शनात सुटीचे औचित्य साधून शेतकऱ्यांबरोबर शेतीक्षेत्रात नवीन काही तरी करण्याची इच्छा असलेल्या नागरिकांनी प्रदर्शनाचा लाभ घेऊन स्टॉलधारकांकडून शेतीचे बारकावे जाणून घेतले.  

रविवारी प्रदर्शनाचा शेवटचा दिवस असल्याने व सुटीचा दिवस असल्याने अनेक शेतकऱ्यांनी कुटुंबातील सदस्यांसहित प्रदर्शन पाहण्यास पसंती दाखवली. शुक्रवारी (ता. ५) प्रदर्शनाचे उद्‍घाटन झाल्यानंतर पश्‍चिम महाराष्ट्रातील शेतकऱ्यांचा ओघ नेमिनाथनगर येथील प्रदर्शनस्थळी सुरू झाला. शेतकऱ्यांबरोबर परिसरातील कृषी मंडळे, कृषी महाविद्यालयांचे विद्यार्थी याबरोबरच अनेक संस्था, संघटना, कारखाने आदींच्या प्रतिनिधींनीही प्रदर्शनास भेट देऊन नवे तंत्रज्ञान अवगत करून घेतले. प्रदर्शनाची सांगता होईपर्यंत गर्दी कायम राहिली.

प्रदर्शनाच्या माध्यमातून ठिबक, पॉलिहाउस, शेततळे, पशुधनासंदर्भातील आधुनिक प्रयत्न, वेगवेगळ्या औषधांची माहिती आपल्याला एकाच ठिकाणी मिळाल्याच्या प्रतिक्रिया शेतकऱ्यांनी नोंदविल्या. याबरोबर नावीन्यपूर्ण अवजाराबाबतही माहिती घेतली. अनेकांनी संपर्क क्रमांक घेऊन भविष्यातील संवाद दृृृृढ करण्याचा प्रयत्न केला. 

जमीन सुपीकतेचा ‘ॲग्रोवन’चा संकल्प

पीकवाढीसाठी जमिनीची सुपीकता ही खूप महत्त्वाची ठरते. यंदा ‘अॅग्रोवन’ने जमिनीच्या सुपीकतेवरच जास्तीत जास्त जागृती करण्याचा संकल्प केला आहे. याअंतर्गत या प्रदर्शनातही जमिनीच्या सुपीकतेवर अनेक तज्ज्ञांनी आपले मत मांडले. याला शेतकऱ्यांनी चांगला प्रतिसाद दिला.

व्याख्यानांना प्रतिसाद

प्रदर्शनात आयोजित ॲग्रोसंवाद या शेतीविषयक व्याख्यानाला शेतकऱ्यांनी भरभरून प्रतिसाद दिला. विशेषकरून ऊस व द्राक्षविषयक व्याख्यानांना शेतकऱ्यांनी उच्चांकी गर्दी करून व्याख्यात्या तज्ज्ञांकडून किफायतशीर शेतीची सूत्रे जाणून घेतली. याचबरोबर डाळिंब शेतीतील विविध योजना, पशुव्यवस्थापनातील बारकावे याबाबत तज्ज्ञांनी दिलेली माहिती शेतकऱ्यांना उपयुक्त ठरली. अनेक शेतकऱ्यांनी व्याख्यात्यांना शेताची पाहणी करण्याचे निमंत्रण देऊन संवादाचा पूल बळकट केला.