सटाणा तालुक्यात शेतीशेजारील पाझर तलाव फोडला; सरपंचाने दिली कबुली

नाशिक  : सटाणा तालुक्यातील चौगाव, अजमीर सौंदाणे व कऱ्हे शिवारात शासनाने लाखो रुपये खर्चून शेतकऱ्यांसाठी बांधलेल्या लखमी पाझर तलावात चौगावच्या सरपंच लक्ष्मण मांडवडे यांनी अतिक्रमण केले. एवढंच नाही तर द्राक्ष व डाळिंबाची बाग पाण्याखाली जाऊ नये, यासाठी शेजारील शेतकऱ्यांचा विचार न करता पाझर तलावाचा बंधारा फोडला. याबाबत शेतकऱ्यांनी तक्रार केली आहे. सरपंचांविरोधात फौजदारी गुन्हा दाखल करावा आणि १५ नोव्हेंबरच्या आत तलावाच्या बंधाऱ्याचे काम पूर्ण करावे, अन्यथा बागलाण तहसील कार्यालयासमोर बेमुदत उपोषण छेडण्याचा इशारा संतप्त शेतकऱ्यांनी निवेदनाद्वारे दिला आहे. दरम्यान, सदर सरपंचाने तलाव फोडल्याची कबुली दिली असून तहसीलदारांकडे दिलेल्या प्रतिज्ञापत्रात दोन दिवसात तलावाचे बांधकाम करून देण्याची ग्वाही दिली आहे. शेतकऱ्यांनी बागलाणचे तहसीलदार जितेंद्र इंगळे-पाटील यांना दिलेल्या निवेदनात म्हटले आहे, सोळा वर्षांपूर्वी शासनाने अजमीर सौंदाणे, कऱ्हे व चौगाव शिवारात पंधरा ते वीस लाख रुपये खर्चून लखमी पाझर तलाव बांधला होता. मात्र, या पाझर तलावात चौगावचे सरपंच लक्ष्मण मांडवडे यांनी पदाचा गैरवापर करून ऐंशी टक्के क्षेत्रात अतिक्रमण केले. बंधाऱ्यालगत शेततळे तयार करून त्याचाही लाभ घेतला आहे. यावर्षी चांगला पाऊस झाला आणि धरणात पाणी आले. मात्र, सरपंच मांडवडे यांनी धरणात आलेले पाणी आपल्या शेतात जाऊ नये, यासाठी अजमीर सौंदाणेकडे राहणाऱ्या शेतककऱ्यांचा विचार न करता बांध फोडून टाकला. सदर बांध फोडल्यामुळे लखमी नाल्यालगतच्या शेतकऱ्यांच्या घरांमध्ये पाणी शिरले. तसेच पिकांचेही मोठे नुकसान झाले.  लक्ष्मण मांडवडे यांनी पत्नी ललिता यांच्या नावे तहसीलदारांना सादर केलेल्या प्रतिज्ञापत्रात म्हटले आहे की, मी केलेला गुन्हा हा फौजदारी स्वरूपाचा आहे, याची मला जाणीव आहे. माझ्या नावाने शेतीच्या क्षेत्रात पाझर तलाव असून लखमी पाझर तलावाचा भराव माझ्याकडून नजरचुकीने फोडला गेला आहे. पाझर तलावाचे बांधकाम येत्या १५ नोव्हेंबरपर्यंत मी स्वखर्चाने पूर्ण करून देईन. ते पूर्ण न केल्यास होणाऱ्या शिक्षेस तयार असेन, असे लिहून दिले  आहे.