गोंदिया जिल्ह्यात गणेशोत्सवाद्वारे शेती प्रबोधन

गोंदिया :गणेशोत्सवाच्या माध्यमातून कृषी तंत्रज्ञान विस्ताराचा आगळावेगळा उपक्रम जिल्ह्यात राबविण्यात येत आहे. जिल्हा अधीक्षक कृषी अधिकारी भाऊसाहेब बऱ्हाटे यांच्या संकल्पनेतील या उपक्रमाअंतर्गत लेंडीजोग (ता. देवरी) येथे जाणीव जागृती करण्यात आली.

गणेशोत्सव हे लोकप्रबोधनाचे प्रभावी माध्यम असल्याचे हेरून बऱ्हाटे यांनी दोनवेळच्या आरतीला जमणाऱ्या ग्रामस्थांच्या माध्यमातून शेती तंत्रज्ञान विस्ताराची कल्पना मांडली. ती प्रत्यक्षातदेखील आणली आहे. लेंडीजोग (ता. देवरी) येथे झालेल्या या कार्यक्रमाला पोलिस पाटील आनंद मानकर, ग्रामपंचायत सदस्य सुनंदा वट्टी, शालीकराम मानकर उपस्थित होते.

कृषी सहायक डी. एस. हरदुले यांनी जागृती सभा घेतली. धानावर तुडतुड्याचा प्रादुर्भाव होत असल्याने शेतकऱ्यांनी करावयाच्या उपाययोजनांबाबत माहिती देण्यात आली. तुडतुड्याच्या नियंत्रणासाठी कीटकनाशक खरेदी केलेल्या शेतकऱ्यांना अनुदान दिले जाणार आहे. डीबीटीच्या माध्यामतून थेट खात्यात ही रक्‍कम जमा केली जाणार असून, त्याकरिता शेतकऱ्यांनी बिले सांभाळून ठेवावी. तुडतुड्याचे निरीक्षण घेण्यासाठी लावण्यात आलेल्या वीज तसेच फेरोमोन ट्रॅपमध्ये खोडकिड्याचा पतंग, तुडतुडे आढळून आले, असे हरदुले यांनी सांगितले.  

प्रबोधनाचा खास पर्याय गणेशोत्सवाच्या माध्यमातून होणारा प्रबोधनाचा हा उपक्रम जिल्ह्यात फारच यशस्वी ठरला आहे. धार्मिक उत्सवात लोक एकत्रित येतात. या गर्दीचा उपयोग प्रबोधनासाठी केला जात असून, ग्रामस्थांचादेखील त्याला सकारात्मक प्रतिसाद मिळत असल्याचे चित्र आहे.