कृषी आयुक्त सिंह यांनी सूत्रे स्वीकारली

पुणे : राज्याच्या कृषी आयुक्तपदाची सूत्रे सचिंद्र प्रताप सिंह यांनी स्वीकारली आहेत. सुनील केंद्रेकर यांची अचानक बदली झाल्यामुळे नव्या आयुक्तांच्या आगमनाची कर्मचाऱ्यांना उत्सुकता होती.  यवतमाळचे जिल्हाधिकारी म्हणून धडाकेबाज कामगिरी करणारे श्री. सिंह हे आयएएस अधिकाऱ्यांच्या वर्तुळात एक कर्तव्यदक्ष अधिकारी म्हणून ओळखले जातात. भंडारा, लातूर, परभणी, नांदेड या जिल्ह्यांमध्ये त्यांनी जिल्हा परिषदेचे मुख्य कार्यकारी अधिकारी तसेच जिल्हाधिकारी म्हणून चांगली कामगिरी बजावली आहे.  श्री. सिंह यांना कृषी आयुक्तपदाची सूत्रे तत्काळ हाती घेण्याचा आदेश मंत्रालयातून मंगळवारी सांयकाळी मिळताच त्यांनी बुधवारी जिल्हाधिकारी कार्यालय सोडले. गुरुवारी दुपारी ते विमानाने पुण्यात पोचले. कृषी आयुक्तालयात त्यांनी पदाची सूत्रे स्वीकारून कामकाजाची प्राथमिक माहिती घेतली.  कृषी विभागातील संचालक प्रल्हादराव पोकळे, विस्तार संचालक डॉ. एस. एल. जाधव, आत्माचे संचालक सुभाष खेमनर, गुणनियंत्रण संचालक अशोक लोखंडे व इतर वरिष्ठ अधिकाऱ्यांशी त्यांनी प्रशासकीय चर्चा केली.  दरम्यान, श्री. केंद्रेकर यांच्या बदलीमुळे कृषी आयुक्तालयातील अनेक कर्मचारी नाराज आहेत. ‘‘श्री. केंद्रेकर यांच्यामुळे खात्याला शिस्त येत होती. त्यांना हटवून कृषी खात्याचे प्रशासकीय नुकसान झाले आहे. विनंतीवरून बदली झाल्याचे जरी म्हटले जात असले तरी आम्हाला ही विनंतीनुसार बदली वाटत नाही,’’ असे कर्मचाऱ्यांचे म्हणणे आहे.  श्री. केंद्रेकर यांना १०५ दिवस आयुक्तपदाची संधी मिळाली. त्यातील ३० दिवस प्रशिक्षणात गेली. यामुळे अवघे ७५ दिवस ते कृषी आयुक्त म्हणून कार्यरत होते. त्यामुळे त्यांची अचानक बदली होण्यामागे काय गौडबंगाल आहे याचा खुलासा अजूनही कर्मचाऱ्यांना झालेला नाही.