कृषी विभागाने उदासीनतेने धान्य महोत्सव टाळला

जळगाव : राज्याचे कृषिमंत्री चंद्रकांत पाटील हे पालकमंत्री असलेल्या जळगाव जिल्ह्यातच कृषी विभागाची चालढकल व उदासीनता आहे. त्यामुळे यंदाचा धान्य महोत्सव टाळण्यात आला आहे. चक्क १४ लाख रुपये निधी परत करण्याची वेळ आली आहे. कृषी विभागातील बेजबाबदार, कामचुकार यंत्रणेबाबत शेतकरी, लोकप्रतिनिधींनी जाहीर नाराजी व्यक्त केली. 

कृषी विभागाने हा महोत्सव टाळताना दुष्काळाचे कारण पुढे केले. परंतु नंदुरबार व धुळे जिल्ह्यांतही दुष्काळ होता. तेथे मात्र मागील महिन्यातच धान्य महोत्सव यशस्वीपणे पार पडला. नाशिकचे पालकमंत्री, जलसंपदामंत्री गिरीश महाजन यांनी देखील जळगावात धान्य महोत्सव का घेतला नाही, असा प्रश्‍न प्रशासनाला विचारला. नाशिकमध्येही हा महोत्सव झाला.

कृषी तंत्रज्ञान व व्यवस्थापन यंत्रणेतर्फे (आत्मा) हा महोत्सव घेण्यात येतो. मागील पाच वर्षे हा महोत्सव झाला. दरवर्षी सुमारे एक कोटी रुपयांची उलाढाल या महोत्सवात होते. शेतकरी, ग्रामीण व शहरी भागांतील महिला बचत गटांचे धान्य, उत्पादनांचे स्टॉल या महोत्सवात असतात. अनेक शेतकऱ्यांनी महोत्सवात आपले धान्य विक्री करण्यासाठी धान्याची पॅकिंग, ब्रॅडिंगही केले. काही शेतकऱ्यांनी आपले संपर्क क्रमांक, पत्ता असलेले कार्डही तयार करून घेतले. परंतु उदासीन कृषी यंत्रणेमुळे महोत्सव मोडीत निघाल्याने शेतकऱ्यांचाही हिरमोड झाला आहे.

कृषी विभागाला हा महोत्सव घेणे शक्‍य होत नसेल, यंत्रणा पुरेशी नसेल, तर आपण हा महोत्सव चाळीसगावात घेऊ, अशी भूमिका आमदार उन्मेष पाटील यांनी घेतली होती. परंतु, त्यासही कृषी विभागाने सपशेल नकार दिला. हा महोत्सव घेण्यासंबंधी शेतकऱ्यांपर्यंत पोचावे लागले, स्टॉल नोंदणी, मार्गदर्शन सत्र, वक्ते, स्टॉलधारक महिलांचा निवास व भोजन याची व्यवस्था करावी लागते. शेतकऱ्यांशी दांडगा संपर्क असलेले अधिकारी, कर्मचाऱ्यांनाच हे काम शक्‍य होते. हे काम करण्याबाबत उदासीनता असल्याने हा महोत्सव कृषी यंत्रणेने टाळल्याची टीका शेतकरी करीत आहेत.