‘कृषी विभागाने केलेले पंचनामेच पीकविम्यासाठी ग्राह्य धरावे’

नगर ः आॅक्टोबर महिन्यात झालेल्या पावसामुळे पिकांचे नुकसान झाले. मात्र त्या वेळी पंचनामे करण्यासाठी कोणत्याही शेतकऱ्याच्या बांधावर विमा कंपनीचे प्रतिनिधी पंचनामे करण्यासाठी गेलेले नाहीत. त्यामुळे कृषी विभागाने केलेले पंचनामेच गाह्य धरून खरिपाचा विमा लागू करावा, अशी मागणी वांबोरी (ता. राहुरी) येथील सामाजिक कार्यकर्ते विष्णू ढवळे यांच्यासह शेतकऱ्यांनी विमा कंपन्यांना निवेदन देऊन केली आहे. 

निवेदनात म्हटले आहे की, खरिपात नगर जिल्ह्यामध्ये अनेक शेतकऱ्यांनी प्रधानमंत्री पीकविमा योजनेतून विमा उतरवला आहे. मात्र आॅक्टोबर महिन्यात झालेल्या जास्तीच्या पावसाने बाजरी, कापूस, तूर, सोयाबीन, मका, कांदा आदींसह खरिपातील अनेक पिकांचे नुकसान झाले.  त्यानंतर झालेल्या नुकसानीचे कृषी, महसूल विभागाने पंचनामे केले. त्यानुसार ३३ टक्‍क्यांपेक्षा जास्त नुकसान झालेल्या शेतकऱ्यांना आर्थिक मदत दिली. ज्या वेळी महसूल, कृषी विभागाचे लोक नुकसानीचे पंचनामे करत होते, त्या वेळी विमा कंपनीचे प्रतिनिधीही नुकसान पाहायला व पंचनामे करायला हजर राहणे गरजेचे होते. मात्र एकही विमा कंपनीचा प्रतिनिधी प्रत्यक्ष नुकसान पाहायला व पंचनामे करायला नव्हता. 

आता झालेल्या नुकसानीची भरपाई देण्यासाठी पीकविम्याचा लाभ देताना पीककापणी व अन्य बाबी पाहण्यापेक्षा शासनाने ज्या शेतकऱ्यांना आर्थिक मदत दिली आहे. त्या शेतकऱ्यांचे पंचनामे गृहीत धरून अतिवृष्टीने नुकसान  झालेल्या शेतकऱ्यांच्या पिकांना विमा योजना लागू करून विम्याचे पैसे थेट खात्यावर जमा करावेत. नुकसान झालेले असतानाही अनेक कारणे पुढे करून पीकविमा योजनेच्या रकमेपासून वंचित ठेवले, तर शेतकरी टोकाचे पाऊल उचलतील व त्याला विमा कंपन्या जबाबदार राहतील, असे विष्णू ढवळे व शेतकऱ्यांनी निवेदनात नमूद केले आहे. पंतप्रधान, केंद्रीय कृषिमंत्री, मुख्यमंत्री, कृषी सचिव, कृषी आयुक्त यांनाही निवेदनाच्या प्रती दिल्या आहेत.