कृषी सचिव डवले यांनी घेतला `महाबीज`चा आढावा

अकोला ः आगामी रब्बी हंगामासाठी `महाबीज`कडे कोणत्या वाणाचे किती बियाणे उपलब्ध आहे, यंदासाठी काय नियोजन केले याचा आढावा राज्याचे कृषी सचिव एकनाथ डवले यांनी घेतला. मंगळवारी (ता.१५) श्री. डवले यांनी `महाबीज`ला धावती भेट देत काही अधिकाऱ्यांसोबत चर्चा केली.  कोरोना संसर्गाच्या पार्श्‍वभूमीवर श्री. डवले यांच्या प्रमुख उपस्थितीत झालेल्या या बैठकीला `महाबीज`चे व्यवस्थापकीय संचालक अनिल भंडारी, मार्केटींग व्यवस्थापक अजय कुचे, उत्पादन व्यवस्थापक सुरेश फुंडकर, गुणवत्ता नियंत्रण व्यवस्थापक प्रफुल्ल लहाने, प्रक्रिया व्यवस्थापक प्रशांत पाग्रुत आदी मोजकेच अधिकारी उपस्थित होते.  येत्या काही दिवसात `महाबीज`च्या बोर्डाची बैठक होऊ घातली आहे. या बैठकीच्या अनुषंगाने असलेल्या मुद्यांचा आढावा श्री. डवले यांनी घेतला. सोबतच त्यांनी आगामी रब्बीसाठी `महाबीज`ने काय नियोजन केले याची माहिती जाणून घेतली. प्रामुख्याने हंगामात शेतकऱ्यांना हरभरा, ज्वारी, गव्हाचे दर्जेदार बियाणे उपलब्ध करून देण्याच्या सूचना त्यांनी `महाबीज`च्या अधिकाऱ्यांना केल्‍या.  श्री. डवले यांच्या या दौऱ्याबाबत कृषी खात्यालाही फारशी माहिती नव्हती. ते अकोल्यात पोचले आणि `महाबीज`मध्ये आढावा घेऊन पुढील ठिकाणी रवाना झाले.