कृषी विज्ञान केंद्राच्या तंत्रज्ञान महोत्सवाला आजपासून सुरुवात

सोलापूर ः ‘‘सोलापुरातील कृषी विज्ञान केंद्राच्या रौप्य महोत्सवी वर्षानिमित्त सोलापुरातील कृषी विज्ञान केंद्रात ‘कृषी तंत्रज्ञान महोत्सव २०२०’ चे आयोजन करण्यात आले आहे. मंगळवारी (ता.२१) आणि बुधवारी (ता.२२) असा दोन दिवस हा महोत्सव चालेल. या महोत्सवादरम्यान सकाळी १० ते ११ या वेळेत शिवारफेरीचे आयोजन करण्यात आले आहे,’’ अशी माहिती वरिष्ठ शास्त्रज्ञ तथा केंद्राचे प्रमुख लालासाहेब तांबडे यांनी दिली.   मंगळवारी (ता. २१) सकाळी ११ वाजता बार्शी रस्त्यावरील कृषी विज्ञान केंद्रात खासदार डॉ. जयसिद्धेश्‍वर महास्वामी यांच्या हस्ते महोत्सवाचे उद्‌घाटन होईल. कार्यक्रमाच्या अध्यक्षस्थानी शबरी कृषी प्रतिष्ठानचे अध्यक्ष प्रदीप गायकवाड असतील. एम. एस. सी. पी. चे संचालक डी. एल. तांभाळे, राष्ट्रीय डाळिंब संशोधन केंद्राच्या संचालिका डॉ. ज्योत्स्ना शर्मा, विभागीय कृषी संशोधन केंद्राचे प्रमुख शास्त्रज्ञ डॉ. व्ही. एम. अमृतसागर, डॉ. नितीन मार्कंडेय, डॉ. सी. बी. देवेज्ञ, जिल्हा अधीक्षक कृषी अधिकारी बसवराज बिराजदार उपस्थित राहणार आहेत.  महोत्सवाच्या दुसऱ्या दिवशी तांत्रिक सत्रात शास्त्रज्ञ डॉ. सुजोग सहा, स्टेट बॅंक ऑफ इंडियाचे सहायक महाव्यवस्थापक सुभाष उकरंडे, जिल्हा उद्योग केंद्राचे व्यवस्थापक बी. जी. यशवंते मार्गदर्शन करणार आहेत. समारोप कार्यक्रमाला आमदार प्रणिती शिंदे प्रमुख पाहुणे म्हणून उपस्थित असणार आहेत. या वेळी प्रगतिशील द्राक्ष उत्पादक दत्तात्रय काळे आणि उद्योजिका वैशाली आवारे त्यांचे अनुभव कथन करणार आहेत.  कृषी प्रदर्शनाचेही आयोजन दोन दिवसाच्या महोत्सवाच्या कालावधीत कृषी प्रदर्शनाचे आयोजन करण्यात आले आहे. या प्रदर्शनात आधुनिक कृषी तंत्रज्ञानाबाबत माहिती देणारी साधने, भित्तिपत्रके, घडीपुस्तिका, सुधारित अवजारे, कृषी निविष्ठा, सोयाबीनयुक्त प्रक्रियायुक्त पदार्थविक्री आदींची माहिती दिली जाणार आहे. १५ पिकांतील ३६ वाण व सुधारित व आधुनिक शिफारशीवर आधारित ४८ कृषी तंत्रज्ञान प्रात्यक्षिके आयोजिली आहेत.