agriculture news in marathi agrowon agralekh on PALM OIL IMPORT BAN IN SHRILANKA | Agrowon

श्रीलंकेचा आदर्श आपण कधी घेणार?

विजय सुकळकर
शनिवार, 10 एप्रिल 2021

आपल्या शेजारील श्रीलंका देश पाम लागवडीवर बंदी आणत असताना आपल्या देशातील सॉल्व्हंट एक्स्ट्राक्टर्स असोसिएशन मात्र देशात पाम लागवडीला प्रोत्साहनाची मागणी करतेय.

श्रीलंका सरकारने पाम तेलाच्या आयातीवर बंदी घातली आहे. त्याचबरोबर देशातील सर्व पाम तेल उत्पादक कंपन्यांना १० टक्के पामची झाडे उपटून त्या ठिकाणी रबर किंवा पर्यावरणास अनुकूल इतर झाडांची लागवड करण्याचे आदेश दिले आहेत. श्रीलंकेने नवीन पाम झाडे लावण्यासही बंदी घातली आहे. पामची झाडे पर्यावरण ऱ्हासास कारणीभूत आहेत. शिवाय पाम तेल आरोग्यास घातक आहे. त्यामुळे श्रीलंकेने तत्काळ असे बंदीचे निर्णय घेतले आहेत. या निर्णयामुळे श्रीलंकेतील पाम तेल उत्पादक कंपन्यांना फटका बसत असला तरी त्याची पर्वा तेथील सरकारला नाही. या निर्णयामुळे श्रीलंकेतील खोबरा उत्पादक शेतकऱ्यांना मात्र प्रोत्साहन मिळणार आहे. आपल्या देशात मात्र नेमका याच्या उलट ध्येयधोरणे राबविली जातात. पंतप्रधान नरेंद्र मोदी हे देशाला आत्मनिर्भर बनविण्यासाठी प्रयत्नशील असल्याचा उल्लेख सातत्याने करतात. प्रत्यक्ष कृती मात्र याच्या उलट सुरू आहे. भारतात पाम लागवडीसह पाम तेल आयातीला प्रोत्साहन देण्याचे काम केंद्र सरकारद्वारे चालू आहे. देशात आयात होत असलेल्या खाद्यतेलांच्या दर्जाची काहीही खात्री नाही. त्यात भेसळही खूप होते. त्यामुळे या देशातील ग्राहकांच्या आरोग्याशी हा एक प्रकारचा खेळच सुरू आहे. खाद्यतेलात देशाला आत्मनिर्भर करण्याची क्षमता असलेला तेलबिया उत्पादक दुर्लक्षितच आहे.

भारत हा जगातील सर्वांत मोठा खाद्यतेल आयातदार देश आहे. देशाला दरवर्षी सरासरी २३ दशलक्ष टन खाद्यतेलाची गरज असते. देशांतर्गत खाद्यतेलाचे उत्पादन फक्त ८ दशलक्ष टन एवढेच होते. अर्थात, भारताला दरवर्षी १५ दशलक्ष टन खाद्यतेल आयात करावे लागते. खाद्यतेलाच्या या आयातीपोटी सरकारी तिजोरीवर दरवर्षी ७५ हजार कोटींचा बोजा पडतोय. सध्या देशात तेलबियांचे ३३ दशलक्ष टन उत्पादन होत असते. खाद्यतेलाच्या बाबतीत स्वयंपूर्णतेसाठी हेच उत्पादन ७० दशलक्ष टनांपर्यंत वाढवणे गरजेचे आहे. खरे तर उद्दिष्ट ठेवून टप्प्याटप्प्याने यात पुढे गेलो तर हे अवघड काम नाही. पूर्वी आपला देश खाद्यतेलाच्या बाबतीत स्वयंपूर्ण होता. या देशात विभागनिहाय विविध तेलबिया पिके घेतली जात होती. यातील काही तेलबिया पिके, तर काही तेलबियांचे देशी वाण आपल्या पीक पद्धतीतून बाद झाली आहेत. काही बाद होण्याच्या मार्गावर आहेत. देशाची खाद्यतेलाची गरज जसजशी वाढत गेली तसतशी तेलबिया पिकांची उत्पादकता वाढविण्याकडे कोणीही लक्ष दिले नाही. त्याऐवजी मलेशिया, इंडोनेशिया येथून पाम तेल तर इतरही अनेक देशांतून खाद्यतेलांची आयात करणे आपल्याला सोपे वाटू लागले आहे. आजही देशात पाम तेलाच्या आयातीलाच प्रोत्साहन देण्याचे काम सुरू आहे. केंद्र सरकारने कच्‍च्या पाम तेलाच्या आयात शुल्कात २७ नोव्हेंबर २०२० ला कपात केली होती. परिणामी, नोव्हेंबर २०२० ते जानेवारी २०२१ या तिमाहीत कच्च्या पाम तेल आयातीत २४ टक्क्यांनी वाढ झाली आहे. एकूण पाम तेलाची आयातही आठ टक्क्यांनी वाढली आहे. आपल्या शेजारील श्रीलंका देश पाम लागवडीवर बंदी आणत असताना आपल्या देशातील सॉल्व्हंट एक्स्ट्राक्टर्स असोसिएशन मात्र देशात पाम लागवडीला प्रोत्साहनाची मागणी करतेय. खरे तर शेंगदाणा, मोहरी, सोयाबीन, सूर्यफूल, करडई या प्रमुख तेलबियांसह तीळ, जवस, कारळा या दुय्यम तेलबिया पिकांच्या क्लस्टरनिहाय उत्पादनवाढीस आणि तेलनिर्मिती उद्योगास प्रोत्साहन द्यायला हवे. याबाबत अभियान अथवा मोहीम राबवून हे काम केल्यास देश खाद्यतेलांच्या बाबतीत स्वयंपूर्ण होऊ शकतो.


इतर संपादकीय
साखर उद्योगाचे दिशादर्शक पाऊल सुमारे पाच वर्षांपूर्वी या देशात हवा विकत...
गो-पीयूष वाढविते  रोगप्रतिकार शक्ती   आज जगभरात कोरोना या विषाणूजन्य संसर्गजन्य...
गंध फुलांचा गेला सांगून  मोहफुले म्हटले की आपल्याला केवळ दारूच आठवते....
शेतीमाल खरेदी-विक्रीत वाटमाऱ्या नकोतचनाशिक जिल्ह्यात व्यापाऱ्यांनी द्राक्ष उत्पादकांना...
साखर उद्योगाची ‘ब्राझील पॅटर्न’च्या...यंदाच्या साखर हंगामामध्ये १० लाख टन साखर उत्पादन...
कोरोनाला हरवायला हवी दुर्दम्य इच्छाशक्तीकोरोनाच्या दुसऱ्या लाटेने संपूर्ण देशातील जनता...
सहकारी चळवळीच्या शुद्धीकरणाची आवश्यकतासहकारी चळवळीने सारे विश्वच व्यापून टाकले आहे. ‘...
देशभरातील बाजारपेठांना जोडतेय किसान... किसान रेल्वेचा सर्वांत जास्त फायदा...
किमया ऑनलाइन मार्केटिंगची  अॅमेझॉनचे वस्तू विक्रीचे स्वतःचे एकही आउटलेट...
प्रक्रियेला पर्याय नाहीकोरोना संक्रमणाच्या काळात सर्वच क्षेत्रांना...
आर्थिक पुनरुज्जीवनाचे आव्हानकोरोनाच्या दुसऱ्या आक्रमणाच्या पार्श्‍वभूमीवर...
बदल्यांचा ‘बाजार’कोरोनाच्या दुसऱ्या लाटेने शहरांसह ग्रामीण...
प्रतिकारशक्ती वाढवायची, तर फळे आणि...संयुक्त राष्ट्रसंघाच्या जागतिक अन्न व कृषी...
कोरोनाचा कहर अन् राजकारणकोरोनाच्या दुसऱ्या लाटेने देशात थैमान घातले आहे....
शेतकरी उत्पादक कंपन्यांची भविष्यातील...मागील काही वर्षात महाराष्ट्रामध्ये जवळपास ५०००...
कसा टिकेल हापूसचा गोडवा?गेल्या हंगामातील लांबलेला पावसाळा, थंडीचे अत्यंत...
घन लागवड तंत्राने वाढवू उत्पादकताजागतिक स्तरावरील वेगवेगळ्या देशांचा विचार केल्यास...
पुराचा धोका शेतीला अन् शहरांनाहीजगभरातील ३० हून अधिक पर्यावरण प्रारूपांची तुलना...
बँकांचे खासगीकरण शेतकऱ्यांच्या मुळावरदेशात व्यापारी बँकांच्या ग्रामीण भागात एकूण शाखा...
कापूस शेतीत राबावा ‘रोबोट’आपल्या देशात कापूस लागवडीखाली १३० लाख हेक्टर...