agriculture news in marathi agrowon agralekh on strong will power is require for victory on corona | Page 3 ||| Agrowon

कोरोनाला हरवायला हवी दुर्दम्य इच्छाशक्ती

विजय सुकळकर
शनिवार, 1 मे 2021

कोरोना कितीही गंभीर पातळीपर्यंत गेला तरी तो बरा होतो, हेच ईस्माइल सय्यद या शेतकऱ्याने दाखवून दिले आहे.

कोरोनाच्या दुसऱ्या लाटेने संपूर्ण देशातील जनता धास्तावलेली आहे. आपल्या राज्यात तर ही महामारी फारच झपाट्याने पसरतेय. दुसऱ्या लाटेतील कोरोना विषाणूच्या बदलत्या रुपाने शहरांसह ग्रामीण भागालाही चांगलाच विळखा घातला आहे. देशभरात दररोज साडेतीन ते चार लाख कोरोना बाधित नवे रुग्ण आढळून येत असून, त्यापैकी आपल्या राज्यातील रुग्णांची संख्या ६५ ते ७० हजार आहे. राज्यात दररोज ७०० ते ८०० रुग्ण कोरोनाने मृत्यू पावत आहेत. हे सगळे चित्र अतिशय भयावह असे आहे. अशा परिस्थितीमध्ये एखाद्या कोरोनाबाधित रुग्णाची ऑक्सिजन पातळी ४० आणि एचआरसीटी स्कोअर २२ येऊनही तो रुग्ण बरा झाला तर! चमत्कारच म्हणावा लागेल ना? असाच चमत्कार लातूर जिल्ह्यातील एका शेतकऱ्याच्या बाबतीत घडला आहे. या जिल्ह्यातील ४२ वर्षे वयाच्या इस्माईल सय्यद या शेतकऱ्याने अतिगंभीर कोरोना आजाराला हरविण्याचे काम केले आहे.

एखाद्याला कोरोनाची लागण झाली की नाही याची खात्री आरटीपीसीआर चाचणीद्वारे करता येते. ताप, सर्दी, खोकला, अंगदुखी अशी प्राथमिक लक्षणे दिसलेल्या रुग्णाची ही चाचणी पॉझिटिव्ह आल्यास त्यास एचआरसीटी चाचणी करावी लागते. एचआरसीटीद्वारे कोरोनाचा संसर्ग नेमका किती आहे, हे कळते. याच चाचणीवरून डॉक्टर उपचाराची दिशाही ठरवतात. एचआरसीटी स्कोअर ० ते ७ सौम्य संसर्ग, ९ ते १८ मध्यम संसर्ग आणि १९ ते २५ अति संसर्ग समजला जातो. कोरोना संसर्गात रुग्णांना श्‍वास घेण्यास त्रास होतो. ऑक्सिजन पातळीदेखील खालावत जाते. ऑक्सिजन पातळी ९४ ते १०० चांगली, ९० ते ९३ कमी, तर ८० ते ८९ फारच कमी मानली जाते. यावरून इस्माईल सय्यद यांचा संसर्ग किती गंभीर होता, हे आपल्या लक्षात यायला हवे. परंतु आपल्या दुर्दम्य इच्छाशक्तीने त्यांनी अति गंभीर कोरोना आजारावर मात केली आहे. कोरोनासोबतच्या या लढ्यात त्यांना लातूर महापालिकेच्या पुरणमल लाहोटी शासकीय तंत्रनिकेतन कोविड केअर सेंटरची योग्य उपचाराच्या रूपाने चांगली साथ लाभली आहे.

ग्रामीण भागात कोरोनाची भीती अधिक आहे. कोरोनाची टेस्ट पॉझिटिव्ह येईल म्हणून अनेक जण ताप, सर्दी, खोकला असे दुखणे अंगावर काढताहेत. डॉक्टरकडे जाण्याचे टाळताहेत. यामुळे स्वतःच्या आरोग्याबरोबर आपण इतरांच्या आरोग्याशी खेळतोय. कोरोनाचे निदान लवकर झाले तर योग्य वेळी योग्य उपचाराने रुग्ण बरे होण्याचे प्रमाण वाढेल, शिवाय बाधित आणि त्यांच्या संपर्कातील सर्वांचे ताबडतोब विलगीकरण झाल्याने या महामारीचा संसर्गही कमी होईल. त्यामुळे कोरोनाची लक्षणे दिसताच ताबडतोब डॉक्टरकडे जायला हवे. डॉक्टरच्या सल्ल्याने योग्य ते तपासण्या करून घ्याव्यात. तपासण्यांमध्ये कोरोनाचा संसर्ग झाल्याचे स्पष्ट झाल्‍यास घाबरून जाण्याचे कारण नाही. कोरोना कितीही गंभीर पातळीपर्यंत गेला तरी तो बरा होतो, हेच ईस्माइल सय्यद या शेतकऱ्याने दाखवून दिले आहे. याउलट सौम्य लक्षणे आणि आजार असताना सुद्धा केवळ काळजी आणि धास्तीने अनेक जणांनी प्राण गमावले आहेत. सय्यद यांच्यावर उपचार केलेल्या रुग्णालयात व्हेंटिलेटर, तसेच रेमडेसिव्हिरसारखे इंजेक्शनही दिले जात नव्हते. अशा परिस्थितीत तेथील डॉक्टरांनी प्रयत्नांची पराकाष्ठा केली. त्याचे फळही त्यांना मिळाले.

कोरोना संसर्ग काळात ऑक्सिजनचे महत्त्व सर्वांनाच कळाले आहे. बहुतांश कोरोनाबाधितांचा ऑक्सिजनअभावी मृत्यू होतोय. अशावेळी नैसर्गिकरीत्या सर्वांना ऑक्सिजन पुरविणाऱ्या झाडांची संख्या राज्यात वाढली पाहिजेत. हा हेतू ठेवूनच या कोविड केअर सेंटरच्या आरोग्य अधिकाऱ्यांनी ईस्माइल सय्यद यांना झाडाचे रोपटे देऊन घरी पाठविले. यातूनही बोध घेत आपल्या गावपरिसरात झाडांची संख्या वाढविण्यासाठी सर्वांनीच प्रयत्न वाढवायला हवेत.


इतर संपादकीय
भाऊबंदकीचे प्रश्नही कायद्यांतर्गतच...पशुसंवर्धन विभागाची स्थापना २० मे १८९२ मध्ये झाली...
पीककर्ज वाटपाच्या मूळ उद्देशाला हरताळराष्ट्रीय व खासगी बॅंकांनी पीककर्ज वाटपासाठी हात...
संरक्षित शेतीला मिळेल चालनासरक्षित शेतीमध्ये प्रामुख्याने ग्रीनहाउस,...
अतिवृष्टीस फक्त हवामान बदलच जबाबदार...यंदाचा नैर्ऋत्य मॉन्सून सरासरी तारखांच्या ...
मायबाप सरकार, तेवढी दारू बंद करा!राज्यघटनेच्या मार्गदर्शक तत्त्वांत ‘पोषणमान व...
‘एफपीओं’ना बनवा अधिक कार्यक्षमशेतीसाठीच्या सध्याच्या अत्यंत प्रतिकूल अशा...
चंद्रपूर दारूबंदी निर्णयाच्या...महाराष्ट्राच्या मंत्रिमंडळाच्या २७ मे रोजीच्या ...
पीकविम्यातील पापीगेल्या आठवड्यात कोसळलेल्या अस्मानी संकटातून...
काम सुरळीतपणे पार पाडण्याचे धोरणराज्याच्या कोणत्याही भागात कधीही गेलो तरी तेथील...
दिशा कार्यक्षम पूर व्यवस्थापनाची!महाराष्ट्र देशी सध्या अतिवृष्टी आणि ...
लपवाछपवीची कमाल!पेगॅसस प्रकरण नवे नाही. नोव्हेंबर-२०१९ मध्ये हे...
मानवनिर्मित आपत्ती!राज्यात बेफामपणे कोसळणाऱ्या पावसाने सगळीकडे एकच...
जल‘प्रलय’शेती हा पूर्वीपासूनच जोखीमयुक्त व्यवसाय आहे....
पृथ्वीवरील वातावरणाचा ढळतोय तोलसरकारकडून सामाजिक वनीकरणाच्या मोहिमेखाली...
युरोपच्या अग्निअस्त्रावर निसर्गाचं...गेल्या काही दिवसांत युरोपमधील पुराच्या बातम्या...
बैलांचा उठलेला बाजारमुळात शेतीच्या यांत्रिकीकरणाने शेतकऱ्यांकडील...
ग्राहक कल्याणात उत्पादकांचे मरण‘इंडिया पल्सेस ॲन्ड ग्रेन्स असोसिएशन’ आणि इंडिया...
मुदत वाढवा, सहभाग वाढेलवर्ष २०२१ च्या खरीप हंगामासाठी जुलैच्या...
स्वयंरोजगार सेवा सहकारी संस्थांचे...आधुनिकीकरण, यांत्रिकीकरण, संगणक क्रांती, माहिती-...
अचूक नियोजन हाच निर्यातबंदीवर उपायकेंद्र सरकार नेहमीच कांद्याचे भाव वाढले, की ते...