कारखानदारांचे लक्ष आता पुढील हंगामावर

कोल्हापूर : आंतराष्ट्रीय बाजारात साखरेचे दर घसरल्याने केंद्राने ठरवून दिलेल्या साखर निर्यातीचे उद्दिष्ट पूर्ण करण्यात कारखान्यांना अपयश आले आहे. आता कारखान्यांनी पक्क्‍या साखरेची निर्यात करण्याऐवजी पुढील हंगामात पहिले दोन महिने कच्ची साखर निर्यात करण्याचा विचार सुरू केला आहे. बांगलादेश व चीन या देशांत कच्ची साखर निर्यात करण्याच्या दृष्टीने चाचपणी सुरू केली आहे.

पुढील हंगामात पहिले दोन महिने पक्की साखर तयार न करण्याबाबतच्या हालचालीही कारखाना पातळीवरून सुरू आहेत. बंपर साखर उत्पादनाचा बोजा पुढील हंगामात पडू नये यासाठी कारखान्यांनी आता सगळे लक्ष पुढील हंगामावर केंद्रित केले आहे. केंद्राने कच्च्या साखरेच्या निर्यातीसाठी अनुदान द्यावे यासाठी साखर उद्योगातून केंद्राकडे मागणी होत आहे.

यंदा राज्यातील १८७ कारखान्यांनी १०७ लाख मेट्रिक टन साखरेचे उच्चांकी उत्पादन घेतले आहे. गेल्या चार दिवसांत साखरेच्या दरात काहीशी वाढ झाली असली तरी शंभर-दीडशे रुपयांच्या वाढीने सगळी साखर विकणेही परवडणारे नसल्याने कारखान्यांनी वाढीव किंमत आली तरच साखर विक्रीला प्राधान्य दिले आहे. केंद्रीय स्तरावरून बफर स्टॉक व साखरेच्या किमान विक्री दराचा प्रस्ताव खाद्य मंत्रालयाकडून सादर झाला असला तरी अजून तो मान्य झालेला नाही. तो मान्य होऊन त्याची कार्यवाही होइपर्यंत पुढील वर्षाचा हंगाम तोंडावर येणार आहे. 

लक्ष पुढील हंगामावरच  अनेक कारखान्यांनी आता लक्ष पुढील हंगामावरच केंद्रित करण्याचे ठरविल्याचे कारखानदार सूत्रांनी सांगितले. राज्यातील कारखाने हंगाम सुरू झाल्यानंतर कच्ची साखर तयार करतात. नंतर पक्की साखर तयार करण्याकडेच कल रहातो. पण येणाऱ्या हंगामात पक्की साखर तयार करणे नुकसानीचे ठरणार असल्याने कारखानदारांनी कच्ची साखर उत्पादित करून पहिले दोन महिने तरी कच्ची साखरच निर्यात करावी यासाठी निर्यातीसाठी योग्य शेजारील देशांचा कानोसा घ्यावा, असा सूर साखर उद्योगातून आहे. साखर उद्योगाचे प्रतिनिधित्व करणाऱ्या संघटनाही कच्या साखरेच्या निर्यातीस अनुकूल असल्याने याबाबत निर्णय होण्याची शक्‍यता आहे. 

केंद्राने या निर्यातीसाठी जर काही प्रोत्साहात्मक अनुदान देण्याचे ठरविल्यास कारखाने कच्या साखरेच्या निर्मितीस प्राधान्य देऊन ती साखर निर्यात करण्यासाठी प्रयत्न करतील. यामुळे पहिले दोन महिने तरी पक्की साखर तयार होणार नाही. पक्‍या साखरेची निर्मिती होणार नाही या शक्‍यतेने देशंतर्गत बाजारात साखरेचे दर वाढल्यास या कालावधीत साखरेची विक्रीही वाढू शकेल.