शेतकऱ्यांना मिळणार पाच रुपयांत पोटभर जेवण

लातूर  : शंभर-दीडशे किलोमीटर अंतरावरून आपला शेतमाल विकण्यासाठी लातूर कृषी उत्पन्न बाजार समितीच्या आडत बाजारात येणाऱ्या शेतकऱ्यांची संख्या लक्षणीय आहे. सकाळी लवकर हे शेतकरी घरातून बाहेर पडतात. त्यांना येथे आल्यानंतर जेवणासाठी हॉटेलमध्ये जावे लागते. त्यांची ही अडचण ओळखून बाजार समितीने सध्याच्या महागाईच्या काळात शेतकऱ्यांसाठी केवळ पाच रुपयांत पोटभर जेवण देण्याचा अभिनव उपक्रम हाती घेतला आहे. दिवंगत नेते विलासराव देशमुख यांच्या जयंतीचे औचित्य साधून शुक्रवारी (ता. २५) या उपक्रमाला सुरवात करण्यात येणार आहे.

लातूर कृषी उत्पन्न बाजार समिती संपूर्ण मराठवाड्यात प्रसिद्ध आहे. लातूरसह परिसरातील जिल्हे, तसेच कर्नाटक आणि आंध्र प्रदेश या शेजारील राज्यातील शेतकरीही आपला शेतमाल विक्रीसाठी येथे घेऊन येतात. या शेतकऱ्यांना लातूर बाजारपेठेत चांगला भाव, तसेच रोखीने पैसे मिळतात. यामुळे लातूर बाजार समितीमध्ये दररोज हजारो शेतकरी शेतमाल घेऊन येतात. अनेक शेतकरी सकाळी किंवा पहाटे जेवण न  करता घराबाहेर पडतात. अशा शेतकऱ्यांना शेतमाल विक्री होईपर्यंत उपाशी राहावे लागते. हॉटेलमधील जेवण परवडत नाही. त्यामुळे बहुसंख्य शेतकरी उपाशीपोटी राहतात. हे लक्षात घेऊन लातूर कृषी उत्पन्न बाजार समितीच्या वतीने शेतकऱ्यांसाठी अत्यल्प दरात भोजनाची सुविधा उपलब्ध करून देण्यात येत आहे.  शेतकऱ्यांना केवळ पाच रुपयांमध्ये पोटभर जेवण दिले जाणार आहे. शुक्रवारी (ता. २५) सकाळी ११ वाजता दिवंगत नेते विलासराव देशमुख यांच्या जयंतीचे औचित्य साधून आमदार अमित देशमुख यांच्या हस्ते या उपक्रमाचा प्रारंभ केला जाणार आहे. 

बाजार समितीत शेतमाल घेऊन येणाऱ्या शेतकऱ्यांची अडचण ओळखून ही योजना सुरू करण्यात आली आहे. यात पाच रुपयांत वरण, भात, भाजी, चपाती, कांदा, लिंबू, ठेचा असे पोटभर जेवण दिले जाणार आहे. याकरिता शेतकरी भोजनालय उभारण्यात आले आहे. त्यात स्टेनस्टीलचा वापर करून फर्निचर तयार करण्यात आले आहे. शेतकऱ्यांना व्यवस्थित बसून भोजन करता येणार आहे. - मधुकर गुंजकर, सचिव, बाजार समिती.